Dhananjay Munde : अभ्यास गट नेमा, समिती तयार करा; पण बंजारा समाजाला एसटीचे आरक्षण द्या! धनंजय मुंडे कडाडले

Banjara Community March In Beed : आमचा बंजारा- गोरमाटी समाज तेलंगणा, कर्नाटक, राजस्थानसह इतर राज्यांमध्ये 'एसटी'मध्ये आहे. मग हैदराबाद गॅझेटनुसार या समाजालाही एसटी प्रवर्गाचे आरक्षण लागू झाले पाहिजे. अभ्यास गट नेमा, समिती तयार करा पण बंजारा समाजाला एसटीचे आरक्षण द्या. या लढ्यात मी शेवटपर्यंत तुमच्या सोबत आहे, अशी ग्वाही देत आमदार धनंजय मुंडे यांनी सरकारकडे मागणी केली.

मी खूप नशीबवान आहे, मंत्री असतो तर या मोर्चात सहभागी होता आले नसते. मंत्री नाही म्हणून बंजारा समाजाचा प्रश्न सरकार समोर मांडण्याची संधी मला या व्यासपीठावरून मिळाली आहे. राज्यातील महायुती सरकार, मुख्यमंत्री देवेंद्र फडणवीस आणि दोन्ही उपमुख्यमंत्री बंजारा समाजाला न्याय देण्याचा प्रयत्न करतील असा विश्वास मला आहे. हैदराबाद गॅझेटमध्ये बंजारा समाजाची आदिवासी म्हणून नोंद आहे. या नोंदीप्रमाणे एसटीचे आरक्षण देऊन त्यांना न्याय द्यावा, अशी भूमिका मुंडे (Dhananjay Munde) यांनी मांडली.

मराठा (Maratha) समाजाला ओबीसीचे आरक्षण देण्यासाठी राज्य सरकारने हैदराबाद गॅझेट मधील नोंदीचा आधार घेतला. यासंदर्भात निर्णय घेत जीआर देखील लागू करण्याचे आदेश देण्यात आले. त्यानंतर राज्यातील वातावरण तापले. ओबीसी समाजाचे आरक्षण धोक्यात आल्याचा आरोप केला जाऊ लागला. तर दुसरीकडे हैदराबाद गॅझेटचा दाखला देत बंजारा समाजाला एसटी प्रवर्गाचे आरक्षण दिले जावे या मागणीसाठी मराठवाड्यात आंदोलन सुरू झाले.

याचाच भाग म्हणून आज हजारोंच्या संख्येने बंजारा समाज रस्त्यावर उतरला आणि त्यांनी आपल्या मागण्यांसाठी जिल्हाधिकारी कार्यालयावर धडक मोर्चा काढला. माजी मंत्री आमदार धनंजय मुंडे हे या मोर्चात सहभागी झाले. व्यासपीठावर भाषण करताना त्यांनी बंजारा- गोरमाटी समाजाला एसटीचे आरक्षण मिळवून दिल्याशिवाय लढा थांबणार नाही आणि या लढ्यात मी शेवटपर्यंत तुमच्या सोबत राहील, अशी ग्वाही दिली.

बंजारा समाजाशी आपले जवळचे संबंध आहेत,इथे मोर्चात उपस्थित असलेल्यांपैकी अर्ध्या लोकांची नावे आपण सांगू शकतो, त्यामुळे तुमचा लढा हा मी माझा लढा समजून खांद्याला खांदा लावून न्याय मिळेपर्यंत तुमच्या सोबत उभा राहील, असा विश्वास धनंजय मुंडे यांनी बंजारा समाजाला दिला. राज्यातील सरकार निश्चितच बंजारा समाजाच्या मागण्यांवर सकारात्मक विचार करेल.अभ्यास गट,समिती काय नियमाची ते नेमा परंतु बंजारा समाजाला एसटीचे आरक्षण द्या, या मागणीचा पुनरुच्चारही धनंजय मुंडे यांनी केला.

बीड मधील बंजारा समाजाच्या या मोर्चाने संपूर्ण राज्याचे लक्ष वेधले. मराठा आरक्षणाच्या मागणीला पाठिंबा देणारे राष्ट्रवादी काँग्रेस पक्षाचे गेवराईचे आमदार विजयसिंह पंडित, राष्ट्रवादी काँग्रेस शरदचंद्र पवार पक्षाचे आमदार संदीप क्षीरसागर, आमदार धनंजय मुंडे, योगेश क्षीरसागर यांनीही मोर्चात उतरत समाजाच्या मागण्यांना पाठिंबा जाहीर केला. बंजारा समाजाच्या आंदोलनात धनंजय मुंडे यांनी उडी घेतल्यामुळे येणाऱ्या काळात हा लढा अधिक तीव्र होण्याची शक्यता आहे.

1.धनंजय मुंडेंनी बंजारा समाजाबाबत काय मागणी केली?
-बंजारा समाजाला थेट एसटी आरक्षण द्यावे, अशी मागणी त्यांनी केली.

2. त्यांनी समिती व अभ्यास गटावर टीका का केली?
- कारण त्यामुळे फक्त वेळ जातो, पण समाजाला प्रत्यक्ष आरक्षण मिळत नाही.

3. हे वक्तव्य कुठे करण्यात आले?
- बीडमधील सभेत हे वक्तव्य करण्यात आले.

4. बंजारा समाजाला आरक्षण का हवे आहे?
- सामाजिक, शैक्षणिक आणि आर्थिक मागासलेपण दूर करण्यासाठी.

5. या वक्तव्याचा राजकीय परिणाम काय झाला?
- महाराष्ट्रातील राजकारणात या मागणीमुळे मोठी चर्चा सुरू झाली आहे.