Pankaja Munde : आंदोलकांनी पंकजा मुंडे यांना घेरले; म्हणाल्या, माझे वडील धनगर समाजाच्या पाठीशी होते मी ही शेवटपर्यंत राहील!

Dhangar Reservation News : हैदराबाद गॅझेट नुसार मराठा समाजातील नोंदी असलेल्या कुणबी जातीचे प्रमाणपत्र आणि त्या आधारे ओबीसीचे आरक्षण लागू करण्याचा राज्य सरकारने निर्णय घेतला त्यानंतर महादेव कोळी बंजारा आणि आता धनगर समाजाने आपल्यालाही एसटी प्रवर्गाचे आरक्षण लागू करावी या मागणीसाठी आंदोलन सुरू केले आहे. जालन्यातील अंबड चौफुली येथे नियोजित अहिल्यादेवी होळकर स्मारकाच्या जागेवर दीपक बोराडे यांनी बेमुदत उपोषण सुरू केले आहे.

उपोषणाच्या आठव्या दिवशी राज्याचे कृषिमंत्री दत्तात्रय भरणे आंदोलन स्थळी दाखल झाले. तर दुसरीकडे जालन्याच्या पालकमंत्री पंकजा मुंडे (Pankaja Munde) या अतिवृष्टीने नुकसान झालेल्या भागाची पाहणी करण्यासाठी आल्या होत्या. यावेळी धनगर आंदोलकांनी त्यांना घेराव घातला तसेच आंदोलन स्थळी भेट देण्याची मागणी केली. दिवंगत लोकनेते गोपीनाथ मुंडे कायम धनगर समाजाच्या पाठीशी होते तशा तुम्हीही आमच्या पाठीशी उभ्या राहा, अशी मागणी आंदोलकांनी केली.

यावर धनगर (Dhangar Reservation) समाज हा आपला समाज आहे माझे वडील या समाजाच्या पाठीशी होते आता मीही शेवटपर्यंत तुमच्या पाठीशी राहणार अशी ग्वाही पंकजा मुंडे यांनी आंदोलकांना दिली. घोषणाबाजी करणाऱ्या आंदोलकांना लवकरच आंदोलन स्थळी भेट देण्याचे आश्वासन देत पंकजा मुंडे आपल्या पाहणी दौऱ्यासाठी पुढे निघाल्या.

तर कृषिमंत्री दत्तात्रय भरणे यांनी धनगर समाजाच्या मागण्यांना आपला पाठिंबा असून धनगर समाजाला एसटीचे आरक्षण मिळावे यासाठी आपण सरकारकडे पाठपुरावा करू असे आश्वासन त्यांनी आंदोलकांना दिले. दीपक बोराडे यांच्या आंदोलनाचा आज आठवा दिवस आहे. त्यांच्या भेटीसाठी अनेक नेते जालन्यात येत असून पालकमंत्री पंकजा मुंडे यांनी आपण लवकरच दीपक बोराडे यांची भेट देऊ असे म्हटले आहे.

दोन दिवसांपूर्वी एडवोकेट गुणरत्न सदावर्ते यांनी धनगर आरक्षण आंदोलन स्थळाला भेट देऊन दीपक बोराडे यांच्या प्रकृतीची चौकशी केली. तसेच धनगर समाज हा एसटी आरक्षणाला कसा पात्र ठरतो त्यासाठी काय नियम आहे, सुप्रीम कोर्टाच्या पाच खंडपीठाच्या न्यायमूर्तींनी दिलेल्या निकालाचा दाखलाही सदावर्ते यांनी दिला होता. याचवेळी आंदोलक दीपक बोराडे यांनी आक्रमक भाषण करत माझा श्वास सुरू असेपर्यंत कायदा, पण ज्या दिवशी माझा श्वास थांबेल त्यानंतर मात्र कुणालाही सोडू नका असा इशारा दिला होता.

जालन्यात धनगर समाजाचा इशारा मोर्चा

धनगर समाजाला एसटी आरक्षण लागू करावे, या मागणीसाठी जालना शहरात इशारा मोर्चा काढण्यात आला. लाखोंच्या संख्येने धनगर समाज मोर्चात सहभागी झाले होते. शहरातील गांधी चमन येथून या मोर्चाला सुरवात झाली. गांधी चमन, टाऊन हॉल, शनि मंदिर, उड्डाण पूल, नूतन वसाहत मार्गे अंबड चौफुली येथे हा मोर्चा दाखल झाला. अंबड चौफुली येथे या मोर्चाचे सभेत रूपांतर झाले.

FAQs

प्र.१: पंकजा मुंडेंना कोणी घेरले?
उ.१: धनगर समाजाच्या आरक्षणासाठी आंदोलकांनी पंकजा मुंडेंना घेरले.

प्र.२: त्यांनी आंदोलकांना काय उत्तर दिलं?
उ.२: त्या म्हणाल्या की माझे वडील धनगर समाजासोबत होते आणि मीही शेवटपर्यंत सोबत राहीन.

प्र.३: धनगर समाजाची मुख्य मागणी काय आहे?
उ.३: धनगर समाजाला आरक्षणाचा लाभ मिळावा ही त्यांची मुख्य मागणी आहे.

प्र.४: हा आंदोलन कुठे झाला?
उ.४: महाराष्ट्रात विविध ठिकाणी आंदोलन पेटले असून पंकजा मुंडे यांच्या नुकसान पाहणी दौऱ्यात आंदोलकांनी घेराव घातला.

प्र.५: पंकजा मुंडेंच्या विधानाचा राजकीय परिणाम होईल का?
उ.५: होय, यामुळे महाराष्ट्रातील आरक्षणाच्या राजकारणावर मोठा प्रभाव पडू शकतो.