Dharashiv DCC bank : भाजप-शिवसेना-राष्ट्रवादीत प्रवेश करूनही दणका: धाराशिव जिल्हा बँकेचे संचालक मंडळ बरखास्तीचे आदेश

Dharashiv News : नाशिक, नागपूर व धाराशिव जिल्हा मध्यवर्ती बँकेला 827 कोटी रुपयांचे भागभांडवल देण्यास मंगळवारी झालेल्या मंत्रिमंडळ बैठकीत मान्यता देण्यात आली. नाशिक, नागपूर जिल्हा बँकेच्या आर्थिक कमकुवतीमुळे या बँकांवर सध्या प्रशासक कार्यरत आहे तर धाराशिव जिल्हा बँकेत कार्यरत असलेले संचालक मंडळ जिल्हा बँकेच्या ढासळत्या आर्थिक स्थितीमुळे बरखास्त करून प्रशासक नियुक्त करण्यासाठी सहकार आयुक्ताना निर्देश देण्यासाठी मान्यता दिली आहे. त्यामुळे धाराशिव जिल्हयातील या संचालक मंडळींना महायुतीमध्ये प्रवेश करूनही दणका बसला आहे.

धाराशिव जिल्हा बँकेचे अध्यक्ष बापूराव पाटील, उपाध्यक्ष मधुकर मोटे, संचालक सुनील चव्हाण, बळवंत तांबारे, नागाप्पा पाटील, विक्रम सावंत, सुरेश बिराजदार, संजय देशमुख, महेबूब पाशा पटेल, संजय कांबळे, संजू पाटील, अपेक्षा आष्टे, प्रविणा कोळपे असे संचालक मंडळ सध्या अस्तित्त्वात होते.

अडीच वर्षांपूर्वी झालेल्या राज्यातील सत्तातरानंतर अनेक संचालक मंडळींनी महाविकास आघाडीतील काँग्रेस, राष्ट्रवादी काँग्रेसची साथ सोडत भाजपमध्ये प्रवेश केला होता. तर काही जणांनी अजित पवार यांच्या राष्ट्रवादी काँग्रेस व एकनाथ शिंदे यांच्या शिवसेनेत प्रवेश केला होता. मात्र, त्यानंतरही संचालक मंडळ बरखास्त करण्याचे आदेश देण्यात आले आहेत.

धाराशिव जिल्हा बँकेच्या ढासळत्या आर्थिक स्थितीमुळे हे संचालक मंडळ बरखास्त करून प्रशासक नियुक्त करण्याचे आदेश दिले आहेत. त्यामुळे महायुतीमधील नेत्यांना धक्का बसला आहे. भारतीय रिझर्व्ह बँकेने नाशिक, नागपूर व धाराशिव जिल्हा मध्यवर्ती बँकेचे पुनर्रभांडवलीकरण व पुनर्जीवन करण्याबाबत सरकारला कळविले आहे. त्यानुसार या तीन बँकांना भागभांडवल म्हणून अर्थसहाय्य मंजूर करण्यात आले आहे.

शेतकऱ्यांना पीककर्ज उपलब्ध करून देण्यासाठी जिल्हा मध्यवर्ती सहकारी बँकेची भूमिका महत्त्वाची असते. जिल्हा बँकेच्या आर्थिक स्थितीवरच सेवाविकास बँकेचे अस्तित्व असते. त्यामुळेच नाशिक, नागपूर व धाराशिव जिल्हा मध्यवर्ती बँकेला 827 कोटी रुपयांचे भागभांडवल स्वरूपात शासकीय अर्थसहाय्य मंजूर करण्यात आले आहे. यामध्ये नाशिक बँकेला 672 कोटी तर नागपूर जिल्हा बँकेला 81 कोटी तर धाराशिव जिल्हा बँकेला 74 कोटी रुपये देण्यात येणार आहेत.