Shivsena News : उद्धव ठाकरेंबद्दल नाराजी नाही म्हणणारे माजी महापौर त्र्यंबक तुपे शिवसेनेत!

Chhatrapati Sambhajinagar : शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे यांच्याबद्दल आपली नाराजी नाही म्हणणारे माजी महापौर त्र्यंबक तुपे अखेर शिवसेनेत गेले. आज मुंबईत गणेशोत्सवाच्या पुर्वीच तुपे यांनी उद्धव ठाकरेंची साथ सोडत उपमुख्यमंत्री एकनाथ शिंदे यांच्या नेतृत्वात काम करण्याचा श्रीगणेशा केला. उद्धव ठाकरे यांनी जिल्हाप्रमुख पद देण्याचा दिलेला शब्द न पाळल्यामुळे तुपे नाराज असल्याच्या चर्चा होत्या.

गेल्या काही दिवसापासून त्र्यंबक तुपे शिंदेच्या शिवसेनेत (Shivsena) जाणार अशी चर्चा होती. परंतु या पक्षप्रवेशाला मुहूर्त लागत नव्हता. अखेर गणपत्ती बाप्पाचे आगमन अवघ्या काही तासात होणार असताना मुंबईत एकनाथ शिंदे, संजय शिरसाट यांच्या उपस्थितीत त्र्यंबक तुपे यांनी पक्षात प्रवेश केला. तुपे यांच्या रुपाने सातवा माजी महापौर शिवसेनेत गेला आहे. शिवसेना उद्धव बाळासाहेब ठाकरे पक्षाने आगामी स्थानिक स्वराज्य संस्था निवडणुकीच्या पार्श्वभूमीवर नव्याने संघटनात्मक बांधणीचे काम हाती घेतले असतानाच तुपे यांनी धक्का दिला.

शिवसेना उद्धव बाळासाहेब ठाकरे पक्षातून सुरू असलेल्या आऊटगोईंगला मध्यंतरी ब्रेक लागला होता. आता स्थानिक स्वराज्य संस्था निवडणुकीची तयारी सुरू असतानाच उद्धव ठाकरे यांच्या पक्षातून पुन्हा आऊटगोईंग सुरू झाले आहे. नुकतेच शिवसेनेच्या निष्ठावंतांच्या शिव संपर्क मोहीमेच्या तयारीसाठीचे छत्रपती संभाजीनगरमध्ये (Chhatrapati Sambhajinagar) शिबीर झाले. एकीकडे पक्ष फुटीनंतर सावरण्याचा प्रयत्न स्थानिक नेते करत आहेत, तर दुसरीकडे पक्ष सोडून जाणाऱ्यांचे सत्र पुन्हा सुरू झाले आहे.

माजी महापौर त्र्यंबक तुपे यांनी शिवसेनेचे नेते खासदार विनायक राऊत यांच्याकडे आपल्या सहसंपर्क प्रमुख पदाचा राजीनामा नुकताच पाठवला होता. त्यामुळे त्यांचा शिवसेनेतील प्रवेश निश्चित समजला जात होता. 37 वर्ष शिवसेनेत महापौर, सभागृह नेते पदासह संघटनेत महत्त्वाची जबाबदारी तुपे यांच्यावर होती. आता तुपे यांनी एकनाथ शिंदे यांच्या नेतृत्वाखाली काम करण्याचा निर्णय घेत मुंबईत पक्षप्रवेश केला आहे.

माजी महापौर नंदकुमार घोडेले, अनिता घोडेले, कला ओझा, किशनचंद तनवाणी, विकास जैन, गजानन बारवाल यांनी याआधीच शिवसेनेत प्रवेश केला आहे. यात त्र्यंबक तुपे यांच्या रुपाने आणखी एका माजी महापौरांची भर पडली आहे. आता पक्ष सोडून जाणाऱ्या माजी महापौरांची संख्या सात झाली आहे. पक्षप्रमुख उद्धव ठाकरे यांच्याबाबत माझी कुठलीच नाराजी नाही. परंतु मला जिल्हाप्रमुख करण्याचे दिलेले आश्वासन पाळले नाही, मला वार्डाच्या विकासाचा विचार करणे गरजेचे आहे, असे म्हणत तुपे यांनी नुकताच आपल्या सहसंपर्क प्रमुख पदाचा राजीनामा दिला होता.