Mahavikas Aghadi : जलील यांना चुकून निवडून आलेले खासदार म्हणत खैरेंनी ठोकला शड्डू!

Chhatrapati Sambhajinagar : छत्रपती संभाजीनगरमध्ये आज महाविकास आघाडीची संयुक्त सभा होत आहे. या सभेला माजी मुख्यमंत्री उद्धव ठाकरे, अजित पवार, अशोक चव्हाण यांच्यासह महाविकास आघाडीचे दिग्गज नेते उपस्थित आहेत. यावेळी बोलताना माजी खासदार चंद्रकांत खैरे यांनी शिंदे - फडणवीस सरकारवर आणि इम्तियाज जलील यांच्यावर जोरदार टीका केली.

चंद्रकांत खैरे म्हणाले, ''महाविकास आघाडीची ही'वज्रमुठ' सभा होऊ न देण्याचा प्रयत्न करण्यात येत होता. दोन गटात भांडण लावून सभा रद्द करण्याचा काहींचा प्रयत्न होता. मुख्यमंत्री सकाळी वीर सावरकर गौरव यात्रा काढतात. त्यांच्या सभेला परवानगी देण्यात येते. पण आमच्या सभेला रात्री परवानगी दिली. पण महाविकास आघाडी ही या 'वज्रमूठ' सभेच्या माध्यमातून उद्धव ठाकरे यांच्या पाठिशी आहे'', असं ते म्हणाले.

''आमच्या गाड्या सभेपासून लांब थांबवल्या गेल्या. आम्हाला मुद्दाम त्रास देण्याचा प्रयत्न करण्यात येत आहे. गेल्या 28 वर्षात आम्ही कुठेही अशांतता होऊ दिली नाही. पण चुकून निवडून आलेले इम्तियाज जलील हे खासदार झाले तेव्हापासून दंगली घडत आहेत'', असा गंभीर आरोप चंद्रकांत खैरे यांनी यावेळी केला.

''इम्तियाज जलील यांनी या शहराच्या नामांतराच्या निर्णयाला विरोध केला. त्यासाठी त्यांनी एक महिना आंदोलन केलं. पण तरी देखील त्यांच्यावर पोलिसांनी कारवाई केली नाही. कारण पोलिसांवर नागपूरचा दबाव होता. पण असं असेल तर भविष्यात आमचं राज्य पुढे येणारच आहे'', असं म्हणत त्यांनी विरोधकांना इशारा दिला.