Mahavikas Aghadi : महाविकास आघाडीच्या सभेला नानांची अनुपस्थिती; कारण आले समोर...

Chhatrapati Sambhajinagar : छत्रपती संभाजीनगरमध्ये आज महाविकास आघाडीची संयुक्त सभा होत आहे. या सभेला माजी मुख्यमंत्री उद्धव ठाकरे, अजित पवार, जयंत पाटील, अशोक चव्हाण यांच्यासह महाविकास आघाडीचे दिग्गज नेते उपस्थित राहणार आहेत. मात्र, काँग्रेसचे प्रदेशाध्यक्ष नाना पटोले या सभेला अनुपस्थित राहणार असल्याची माहिती समोर आली आहे.

महाविकास आघाडीच्या या 'वज्रमुठ' सभेला महाविकास आघाडीतील महत्वाचा पक्ष असलेल्या काँग्रेसचे प्रदेशाध्यक्ष नाना पटोले हेच अनुपस्थित राहणार असल्यामुळे चर्चेला उधाण आलं आहे. मात्र, नाना पटोले यांची प्रकृती ठिक नसल्यामुळे ते या सभेला उपस्थित राहणार नाहीत, असं सांगण्यात आलं आहे.

महाविकास आघाडीच्या तीनही पक्षांचे महत्वाचे नेते या सभेला उपस्थित राहणार आहेत. पण नाना पटोले हे प्रकृतीच्या कारणास्थव उपस्थित राहणार नसल्यामुळे काँग्रेसकडून अशोक चव्हाण आणि बाळासाहेब थोरात हे उपस्थित राहणार असल्याचे सांगण्यात येत आहे.

दरम्यान, या सभेच्या माध्यमातून महाविकास आघाडीतील नेते सत्ताधाऱ्यांवर काय बोलणार? तसेच आगामी निवडणुकांच्या पार्श्वभूमीवर काही बोलणार का? याकडे सर्वांचे लक्ष लागले आहे.