Beed News : गेवराईत पृथ्वीराज पंडित कार्यकर्त्यांसाठी मामीच्या विरोधात मैदानात!

Marathwada Local Body Election : गेवराईच्या राजकारणाची सुरुवातच पवार विरुद्ध पंडित अशी झाली. काही काळ नात्या - गोत्यांमुळी थंडावलेले पंडितांचे राजकीय युद्ध पुन्हा मागच्या 12 वर्षांपासून सुरु झाले. आता तर पंडितांच्या तिसऱ्या पिढीतील पृथ्वीराज पंडित चक्क आपल्या सख्ख्या मामींच्या विरोधात मत मागत आहे. विशेष म्हणजे ते आपल्या कुटूंबातील कोणासाठी नाही तर कार्यकर्त्यांसाठी मैदानात आहेत.

बीड जिल्ह्यातील बीडसह गेवराई, माजलगाव, परळी, अंबाजोगाई आणि धारुर नगर पालिकांच्या निवडणुकांचा प्रचार रंगात आणि शिगेला पोचला आहे. जिल्ह्यात मंत्री पंकजा मुंडे, आमदार धनंजय मुंडे, प्रकाश सोळंके, विजयसिंह पंडित, नमिता मुंदडा या सत्तापक्षातील आमदारांसह राष्ट्रवादी काँग्रेस शरदचंद्र पवार पक्षाचे आमदार संदीप क्षीरसागर ताकदीने आपापल्या नगरपालिका लढवत आहेत.

बीडमध्ये राष्ट्रवादी काँग्रेसमध्ये ऐनवेळच्या राजकीय घडामोडींमुळे विजयसिंह पंडित यांच्यावर गेवराईसह बीडचीही धुरा आहे. त्यांचे जास्त लक्ष बीडवर असल्याने गेवराईत त्यांचे थोरले बंधू अमरसिंह पंडित अधिकची जबाबदारी पेलत आहेत. पण, या मैदानात अमरसिंहांचे चिरंजीव व विजयसिंहांचे पुतणे रणवीर आणि दुसरे पुतणे पृथ्वीराज पंडित हे तरुणही प्रचाराच्या रिंगणात आहेत.

गेवराईत भाजपकडून माजी आमदार लक्ष्मण पवार यांच्या भावजय व बाळराजे पवार यांच्या पत्नी गिता पवार तर राष्ट्रवादी काँग्रेसकडून शितल दाभाडे रिंगणात आहेत. या ठिकाणी पंडित व पवारांची प्रतिष्ठा पणाला लागली आहे. पुर्वीच्या पंडित - पवारांच्या दुसऱ्या टप्प्यातील राजकीय समझोत्यात विधानसभा पंडितांकडे तर नगर पालिका पवारांकडे असे अलिखीत सुत्र काही काळ चालले. माजी आमदार लक्ष्मण पवार यांची विधिमंडळातील एंट्रीही गेवराई नगर पालिकेचे नगराध्यक्ष म्हणूनच झालेली आहे.

अलिकडे लक्ष्मण पवार प्रकृतीच्या कारणांनी राजकीय आखाड्यापासून दुर होताच त्यांचे धाकटे बंधू बाळराजे पवार सक्रीय झाले आणि भाजपात गेले. त्यांच्या पत्नी गिता पवार भाजपकडून रिंगणात उतरल्या. पंडितांनीही सामान्य कार्यकर्ता माजी नगराध्यक्ष महेश दाभाडे यांच्या पत्नी शितल दाभाडे यांना रिंगणात उतरवले आहे. पंधरा वर्षांची पवारांची पालिकेवरील सत्ता उलथवण्यासाठी पंडितांनी जोर लावला आहे. याचे नेतृत्व तरुण पिढीचे रणवीर आणि पृथ्वीराज पंडित यांच्याकडे आहे.

पृथ्वीराज हे गिता पवार यांचे सख्खे भाचे आहेत. मात्र, ते सख्ख्या मामीच्या विरोधात आपल्या कार्यकर्त्यासाठी मत मागत आहेत. दरम्यान, गेवराईचा राजकीय इतिहास पाहिला तर शिवाजीराव पंडित व दिवंगत माजी आमदार माधवराव पवार असा कायम सामना असे. पुढे दिवंगत माधवरावांच्या कन्या वृषाली जयसिंग पंडितांच्या पत्नी म्हणून शिवाजीराव पंडितांच्या घरी सुन म्हणून आल्या. काही काळ पंडित - पवार राजकीय संघर्ष थंडावला आणि पंडित विरुद्ध पंडित असाच सामना वीस वर्षे रंगला.

पण, पुढे 2014 पासून पुन्हा पंडित विरुद्ध पवार सामने सुरु झाले. मागच्या निवडणुकीतही त्यांनी मामा लक्ष्मण पवार यांच्या विरोधात मत मागीतले असले तरी त्यावेळी त्यांचे सख्खे काका आमदार विजयसिंह पंडित रिंगणात होते. आता नगर पालिकेत थेट पंडित विरुद्ध पवार सामना नसला तरी जयसिंग पंडित यांचे चिरंजीव पृथ्वीराज आपल्या धाकट्या मामी गिता पवारांच्या विरोधात मैदानात आहेत.