Police Officer Death : दोन महिन्यांपूर्वीच हिंगोलीत बदली; फौजदाराची धावत्या रेल्वेसमोर उडी, पोलिस दलात खळबळ

Hingoli Police News : हिंगोली शहरात पोलिस दलाला हादरवून सोडणारी घटना घडली आहे. नियंत्रण कक्षात कार्यरत असलेल्या 50 वर्षीय फौजदार अमोल गंगलवाड यांचा रेल्वेच्या धडकेत मृत्यू झाला.

खटकाळी रेल्वे उड्डाणपुलाखाली आज सकाळी साडेआठच्या सुमारास ही घटना घडली. या घटनेमुळे हिंगोली पोलिस दलात खळबळ उडाली आहे.

मिळालेल्या माहितीनुसार, अमोल गंगलवाड हे सकाळी खटकाळी रेल्वे उड्डाणपुलाजवळ गेले होते. त्यावेळी ते काही तणावात असल्याचे सांगितले जात आहे. पूर्णाकडून अकोलाच्या दिशेने जाणारी रेल्वे (Railway) पुलाजवळ आली असताना ही दुर्दैवी घटना घडली.

घटनेची माहिती मिळताच रेल्वे स्टेशन मास्तरांनी हिंगोली पोलिसांना (Police) कळवले. माहिती मिळाल्यानंतर पोलिस अधीक्षक श्रेणिक लोढा यांच्या मार्गदर्शनाखाली पोलिस अधिकारी आणि कर्मचाऱ्यांनी घटनास्थळी धाव घेतली. पोलिस निरीक्षक देवेंद्रसिंह ठाकूर, सहायक निरीक्षक दिलीपकुमार मस्क, सहायक फौजदार संजय मार्के यांच्यासह पथकाने घटनास्थळी पाहणी केली.

दोन महिन्यांपूर्वीच हिंगोलीत बदली

अमोल गंगलवाड यांची सुमारे दोन महिन्यांपूर्वी परभणी येथून हिंगोली जिल्हा पोलिस दलात बदली झाली होती. ते हिंगोलीच्या नियंत्रण कक्षात कार्यरत होते. त्यांच्या मृत्यूची माहिती मिळताच पोलिस दलातील सहकारी आणि अधिकाऱ्यांकडून हळहळ व्यक्त करण्यात येत आहे.

पोलिस अधीक्षक म्हणाले.....

गंगलवाड यांनी हे टोकाचे पाऊल का उचलले, त्यामागे नेमके कोणते कारण होते किंवा ते कोणत्या तणावातून जात होते, याबाबत सध्या स्पष्ट माहिती समोर आलेली नाही. या घटनेमागील कारणांचा तपास करण्याच्या सूचना देण्यात आल्याची माहिती पोलिस अधीक्षक श्रेणिक लोढा यांनी दिली.

घटनेमागचे कारण काय?

अमोल गंगलवाड यांनी अचानक जीवन संपवल्याने पोलिस दलात विविध प्रश्न उपस्थित झाले आहेत. दोन महिन्यांपूर्वीच हिंगोलीत रुजू झालेल्या गंगलवाड यांच्यावर कोणता ताण होता का, त्यांच्या वैयक्तिक किंवा सेवेशी संबंधित काही अडचणी होत्या का, याचा तपास पोलिसांकडून केला जात आहे. दरम्यान, या प्रकरणाचा तपास सुरू असून अधिकृत तपासातूनच गंगलवाड यांच्या मृत्यूमागील नेमके कारण स्पष्ट होणार आहे.