Maharashtra Politic's : मलाही एकनाथ शिंदेंकडून ऑफर होती : शिवसेना नेत्याचा गौप्यस्फोट

मुंबई : मुख्यमंत्री एकनाथ शिंदे यांच्याकडून मलाही ऑफर होती, असा गौप्यस्फोट शिवसेनेचे (उद्धव बाळासाहेब ठाकरे) राज्यसभा सदस्य संजय राऊत यांनी केला आहे. त्यामुळे राज्याच्या राजकारणात पुन्हा एकदा खळबळ उडाली आहे. (I too had an offer from Eknath Shinde: Shiv Sena leader's secret blast)

खासदार संजय राऊत (Sanjay Raut) यांनी एका मुलाखतीत हा गौप्यस्फोट केला आहे. ते म्हणाले की, मी शिवसेना (shivsena ठाकरे गट) पक्ष सोडून शिंदे गटाबरोबर जात नाही; म्हणून मला तुरुंगात टाकण्यात आले. मी तुरुंगात गेलो, पण तत्वाशी तडजोड केली नाही. उद्धव ठाकरेंसोबत कायम राहिलो.

मला एकनाथ शिंदे (Eknath Shinde) यांच्याकडून ऑफर होती, हे सगळ्यांना माहिती आहे. तसे पुरावे आहेत. मी म्हटलं, माझी मान कापली तरी मी त्यांच्यासोबत जायला तयार नाही. मी शिवसेना सोडणार आणि ठाकरे परिवाराला सोडून कुठेही जाणार नाही, असे मी त्यांना ठणकावून सांगितले.

मुख्यमंत्री एकनाथ शिंदे हे सुद्धा आमचे मित्रच होते ना. आम्हीसुद्धा अनेक वर्षे एकत्रच काम केले आहे ना. त्यामुळे त्याकाळामध्ये संवाद तर होताच ना. त्यामुळे मला शिंदे यांच्याकडून ऑफर होती. मात्र, मी ती नाकारली, असेही संजय राऊत यांनी स्पष्ट केले.

एकनाथ शिंदे यांच्याबरोबर गेलेल्या अकरा लोकांवर ईडी, सीबीआयच्या कारवाया सुरू होत्या. कोणत्याही क्षणी जेलमध्ये जातील, अशी त्यांची अवस्था हेाती. अनेकांना वॉरंट आलेली आहेत. अनेकजण ईडीच्या कार्यालयात जाऊन बसत होते. सगळेच काही माझ्यासारखे नाहीत. ठीक आहे अटक करा म्हणून सांगणारे. हे सांगायला हिम्मत लागते. ज्या पक्षाने मला ३० ते ४० वर्षे दिले आहे, त्या पक्षाशी मी बेईमानी कशी करू, अशी भावना मनामध्ये असायला हवी होती.

ज्या पक्षाने मला वैभव दिलं, त्या पक्षासाठी मी पाच महिने तुरुंगात गेलो, तर काय बिघडलं असतं. जेल जाना या मुख्यमंत्री होना या मिनिस्टर होना. डरपोक लोक म्हणतात, मै जेल नही जाऊंगा मैं मुख्यमंत्री बनूंगा, असा टोलाही त्यांनी मुख्यमंत्री शिंदे यांना लगावला.