Imtiaz Jaleel On Sanjay Shirsat : पालकमंत्री संजय शिरसाट यांचे गैरव्यवहार बाहेर काढल्यानंतर माझ्यावर अॅट्राॅसिटी; इम्तियाज जलील यांचा न्यायालयात युक्तीवाद!

Court News : पालकमंत्र्यांच्या जमीनचा गैरव्यवहार बाहेर काढल्यामुळे आपल्याविरोधात अॅट्राॅसिटी गुन्हा दाखल केल्याचा दावा करत एमआयएमचे प्रदेशाध्यक्ष तथा माजी खासदार इम्तियाज जलिल यांनी अप्पर सत्र न्यायाधीश रा. दा. पाटील यांच्या न्यायालयात मंगळवारी (ता. 10) स्वतः युक्तीवाद केला. आता या प्रकरणावर 21 फेब्रुवारी रोजी सुनावणी ठेवण्यात आली आहे.

पालकमंत्री व त्यांच्या मुलाचे जमीन गैरव्यवहार प्रकरण जनसामान्यांच्या लक्षात आणून देण्यासाठी पत्रकार परिषद आयोजीत केली होती. पत्रकार परिषदेत आपण केवळ एका सरकारी कागदपत्राचे वाचन केले. आपला एखाद्या समुदायाला दुखावण्याचा उद्देश नव्हता. परंतु आपल्याला शांत बसवण्यासाठी माझ्याविरुद्ध ऑगस्ट महिन्यात बेगमपुरा व क्रांतीचौक पोलिस ठाण्यात अनुसूचित जाती व जमाती प्रतिबंधक कायद्यान्वये (अॅट्राॅसिटी) गुन्हा दाखल करण्यात आला असल्याचे युक्तिवाद इम्तियाज जलील यांनी केला.

न्यायालयात पार्टी इन पर्सन नुसार इम्तियाज जलील यांनी स्वत: युक्तिवाद करत वरील गुन्ह्यातून मुक्त करण्याची विनंती केली. यासाठी त्यांनी सुमारे 20 मिनिटे युक्तिवाद करताना माझादेवी विरुद्ध ओंकारदीप अहलुवालिया, कर्नाटकातील प्रकरणांचा दाखल देत व केंद्र सरकारने राज्याच्या समाजकल्याण मंत्रालयास पाठवलेल्या पत्रात नमूद बंदी असलेल्या शब्दाकडे लक्ष वेधून ही पत्रेही सादर केली.

आपल्याविरुद्ध दाखल तक्रारींमध्ये आपण मुस्लिम धर्माचे असल्याचेही नमूद केल्याकडे इम्तियाज जलील यांनी लक्ष वेधले. दोन माध्यम वाहिन्यांमध्ये वारंवार आपल्या पत्रकार परिषदेतील नेमक्या शब्दांचा वापर केलेला दाखवण्यात आला, असला तरी आपण केवळ एकदाच सरकारी पत्रातील त्या एका शब्दाचा वापर केल्याचे इम्तियाज जलील यांनी सांगीतले.

मात्र यावेळी सरकारी वकील सतीश मुंदवाडकर यांनी सदर प्रकरणात फिर्यादीचे म्हणणे ऐकल्याशिवाय न्यायालयाने कुठलाही निर्णय देऊ नये, असा अर्ज सादर केला. त्यामुळे या प्रकरणावर आता 21 फेब्रुवारी रोजी पुढील सुनावणी ठेवण्यात आली आहे.