मुख्यमंत्री उद्धव ठाकरे यांच्या स्वास्थ्यासाठी खैरेंचे महादेवाला साकडे

औरंगाबाद ः मान आणि पाठ दुखीमुळे छोटीशी शस्त्रक्रिया करावे लागलेले महाराष्ट्राचे मुख्यमंत्री उद्धव ठाकरे यांची प्रकृती ठणठणीत राहावी, यासाठी शिवसेना नेते चंद्रकांत खैरे यांनी खडकेश्वर येथील महादेवाला साकडे घातले. अभिषेक करून खैरे यांनी मुख्यमंत्र्यांचे स्वास्थ चांगले रहावे, त्यांना दिर्घायुरारोग्य लाभो, अशी महादेवाच्या चरणी प्रार्थना केली.

उद्धव ठाकरे यांना गेल्या काही दिवसांपासून मान आणि पाठ दुखीचा त्रास सुरू झाला होता. तज्ञ डाॅक्टरांच्या सल्ल्यानूसार आज त्यांच्यावर मुंबईतील रिलायन्स हाॅस्पीटलमध्ये शस्त्रक्रिया करण्यात आली. डाॅक्टरांचे एक विशेष पथक त्यांच्यावर लक्ष ठेवून आहे. त्यांच्या प्रकृतीची चिंता करू नये, लवकरच ते महाराष्ट्राच्या सेवेत रुजू होतील, असे शिवसेनेच्या वतीने कळवण्यात आले आहे.

गेल्या दोनवर्षापासून उद्धव ठाकरे हे महाविकास आघाडीचे प्रमुख म्हणून राज्याचा कारभार पाहत आहेत. कोरोना, दुष्काळ, चक्रीवादळ, पूर अशी एकापाठोपाठ संकट येत असतांना देखील ठाकरेंनी राज्याला सुखरूप बाहेर काढले. मात्र या ताण तणावत त्यांना मान आणि पाठदुखीचा आजार जडला. डाॅक्टारांच्या सूचनेनंतर उद्धव ठाकरे यांनी छोटीशी शस्त्रक्रिया करण्याचा निर्णय घेतला.

त्यासाठी ते कालच रुग्णालयात दाखल झाले होते. त्याचा आजार गंभीर नसून प्रकृतीची काळजी करण्यासारखे नाही, तीन-चार दिवसांतच ते बरे होऊन राज्याच्या जनतेच्या सेवेत रूजू होतील असे, शिवसेना नेते खासदार संजय राऊत यांनी कळवले होते.

आज उद्धव ठाकरे यांच्यावर प्रत्यक्षात शस्त्रक्रिया सुरू होती तेव्हा शिवसेना नेते चंद्रकांत खैरे हे त्यांच्या उत्तम आरोग्यासाठी शहरातील खडकेश्वर येथील महादेव मंदिरात अभिषेक करत होते.

उद्धव ठाकरे यांची प्रकृती चांगली राहावी, त्यांना उत्तम आरोग्य लाभावे, दिर्घायुरारोग्य लाभावे, असे साकडे त्यांनी महादेवाला घातल्याचे सांगितले. यावेळी शिवेसनेचे अनेक पदाधिकारी देखील उपस्थित होते.