Prashant Bamb News: छत्रपती संभाजीनगर जिल्हा परिषदेनंतर आमदार प्रशांत बंब यांनी वळवला पुन्हा महापालिकेकडे मोर्चा

Chhatrapati Sambhajinagar News: छत्रपती संभाजीनगर जिल्हा परिषदेत धडक देऊन भाजपचे आमदार प्रशांत बंब यांनी प्रशासकांच्या काळात कोट्यावधींची बोगस बिले उचलून भ्रष्टाचार झाल्याचा आरोप केला. तत्कालीन प्रशासक मीना यांचे नाव घेत बंब यांनी आरोप केल्यामुळे जिल्हा परिषदेत एकच खळबळ उडाली होती. त्यानंतर आज छत्रपती संभाजीनगर महापालिकेकडे आमदार प्रशांत बंब यांनी आपला मोर्चा वाढवला होता.

महापालिकेत भाजपची शतप्रतिशत सत्ता आणि महत्त्वाच्या पदावर उपमहापौर वगळता सर्वत्र भाजपचे पदाधिकारी असताना प्रशांत बंब नेमका आता महापालिकेतील कोणता भ्रष्टाचार उघडकीस आणणार? अशी चर्चा त्यांच्या भेटीनंतर राजकीय वर्तुळात सुरू झाली आहे.

गंगापूरचे आमदार प्रशांत बंब मंगळवारी (ता. नऊ) महापालिकेत दाखल झाले. त्यांनी आयुक्तांच्या भेटीनंतर स्थायी समिती सभापती, उपमहापौरांसह विरोधीपक्षनेत्याच्या दालनात जाऊन सदिच्छा भेट घेतली. प्रशासकीय कारभार असताना आमदार बंब यांनी भ्रष्टाचाराचे आरोप करत गतवर्षी महापालिकेत ठिय्या दिला होता. पण यावेळी भाजपची महापालिकेत सत्ता असताना त्यांनी आयुक्तांची भेट घेतल्याने आश्‍चर्य व्यक्त केले जात आहे.

आमदार प्रशांत बंब मंगळवारी सकाळी महापालिकेत आले. त्यानंतर त्यांनी आयुक्तांची भेट यावर माध्यमांना माहिती दिली. प्रशासक काळात या छत्रपती संभाजीनगर महापालिकेत मोठी अनियमितता झाली आहे, कोट्यवधींचे व्यवहार करण्यात आले आहेत. याबद्दल यापूर्वीही आपण पत्रव्यवहार केला होता, प्रत्यक्ष भेटून या बद्दलची माहिती विचारली होती. त्यावर काय कारवाई करण्यात आली हे जाणून घेण्यासाठी आयुक्तांची भेट घेतली.

यावेळी अधिकारी देखील उपस्थित होते. कोणत्याही मुद्यांची माहिती अधिकाऱ्यांना देता आली नाही, त्यामुळे आयुक्तांनी सर्व माहिती घेऊन तुम्हाला चर्चेसाठी बोलावतो, असे सांगितले आहे. प्रशासकांच्या विशेषाधिकारात कोणत्याही प्रकारची निविदा न काढता प्रशासकांसह अधिकाऱ्यांचे बंगले सजवण्यात आले, याबद्दल देखील आयुक्तांना माहिती दिली व कारवाईबद्दल प्रश्न विचारला. आयुक्तांनी याबद्दल माहिती घेतो असे सांगितल्याचे बंब म्हणाले.

कचऱ्यावर बायोमायनिंगची प्रक्रिया करण्यासाठी काढण्यात आलेल्या निविदेबद्दलही आयुक्तांकडे तक्रार केल्याचे बंब म्हणाले. निविदा भरली एका एजन्सीने, काम करते दुसरीच एजन्सी. त्या एजन्सीकडून कचऱ्यावर प्रक्रिया न करता तो दुसरीकडे टाकण्यात येतो. आयुक्तांनी या बद्दल स्वतंत्र बैठक घेण्याचे मान्य केले असा उल्लेख बंब यांनी केला.

दोन दिवसात जिल्हा परिषद आणि महापालिकेत भेट देत प्रशासक काळातील भ्रष्टाचाराची प्रकरण बाहेर काढत प्रशांत बंब यांनी प्रशासक राज विरोधात मोहीम उघडली असल्याचे त्यांच्या या भेटीगाठीवरून स्पष्ट होत आहे.