धाराशिव जिल्ह्यातील तुळजापूर येथे घडलेल्या हिंसाचाराच्या घटनेनंतर खासदार ओमराजे निंबाळकर चांगलेच संतप्त झाले आहेत. कुलदीप मगर यांच्यावर झालेल्या प्राणघातक हल्ल्याबाबत त्यांनी गंभीर सवाल उपस्थित करत, “संतोष देशमुखांसारखीच घटना तुळजापूरात घडवायची होती का?” असा थेट प्रश्न विचारला आहे.
बीड जिल्ह्यात मस्साजोगचे सरपंच संतोष देशमुख यांची ज्या अमानुष पद्धतीने हत्या झाली, त्याच प्रकारची भीती आणि दहशत तुळजापूरात निर्माण करण्याचा प्रयत्न सुरू आहे का, असा आरोप त्यांनी केला.
कुलदीप मगर यांच्या जबाबाचा उल्लेख करत ओमराजे निंबाळकर म्हणाले की, तू पीटू गंगणे यांच्या विरोधात काम केलं आहे. तर तुला उचलून नेऊन त्यांच्या समोरच तुला मारू, अशा पद्धतीची धमकी जर या गुंड वृत्तीची लोक एखाद्याच्या घरात जाऊन देत असतील तर नेमकं काय त्यांना दर्शवायचं आहे.
घरात घुसून धमक्या देणे, उचलून नेऊन मारहाण करण्याची भाषा करणे, हे सरळसरळ गुंडगिरीचे लक्षण आहे. एखाद्या व्यक्तीने राजकीय विरोधात काम केले म्हणून त्याच्यावर तलवार, कोयता आणि बंदुकीचा वापर होतो, ही बाब अत्यंत गंभीर आहे. बीडप्रमाणेच तुळजापुरातही दहशत रुजवायची आहे का?, असा सवाल त्यांनी उपस्थित केला.
तुळजापुरातील नगराध्यक्ष पदाच्या निवडणुकीच्या पार्श्वभूमीवर हा प्रकार घडला. महाविकास आघाडीचे उमेदवार अमर मगर यांचे बंधू ऋषी मगर आणि भाजपचे उमेदवार पिटू गंगणे यांच्यात सुरुवातीला वाद झाला होता. तो वाद मिटल्याचे सांगितले जात असतानाच काही वेळाने अमर मगर यांचे दुसरे बंधू कुलदीप मगर यांच्यावर हल्ला करण्यात आला.
कुलदीप मगर यांच्या म्हणण्यानुसार, पिटू गंगणे यांच्या विरोधात प्रचार केल्यामुळेच आपल्यावर हल्ला झाला. या हल्ल्यात धारदार शस्त्रांचा वापर झाला असून जीवे मारण्याच्या उद्देशाने गोळीबारही झाल्याचा आरोप त्यांनी केला आहे.
या घटनेनंतर खासदार ओमराजे निंबाळकर यांनी पोलिसांच्या भूमिकेवरही प्रश्नचिन्ह उपस्थित केले. गुन्हेगारी प्रवृत्तीच्या लोकांना अप्रत्यक्षपणे संरक्षण दिले जात असल्याचा आरोप त्यांनी केला. ड्रग्स प्रकरणात अडकलेल्या लोकांकडे गावठी कट्टे आणि पिस्तुलं कुठून येतात, याची सखोल चौकशी व्हावी आणि दोषींवर कठोर कारवाई करावी, अशी मागणी त्यांनी केली.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.