High Court News : पैठण-पंढरपूर पालखी मार्गाचे काम वेळेत पूर्ण केले नाही ; अभियंत्यांना खंडपीठाची नोटीस..

Chhatrapati Sambhajinagar : पैठण पंढरपूर पालखी मार्गाचे काम ऑगस्ट २०२३ पर्यंत करण्यात येईल असे आश्वासन राष्ट्रीय महामार्ग प्राधिकरणाने दिले होते. मात्र हे काम वेळत न झाल्याने दाखल अवमान याचिकेत प्रतिवादींना नोटीस बजावण्याचे आदेश मुंबई उच्च न्यायालयाचे न्यायमूर्ती नितीन बी. सूर्यवंशी व न्यायमूर्ती संदीपकुमार सी. मोरे यांनी दिले आहेत.

पैठण (Paithan) पंढरपूर पालखी मार्गाचे 2017 मध्ये प्रत्यक्ष काम सुरू करण्यात आले होते. हा महामार्ग पैठण मुंगी, बोधेगाव, घोगसपारगाव, उखंडाचकला, मिडसांगवी, शिरूर कासार, राक्षस भुवन, कारेगाव, डोंगरकिन्ही, चुंबळी, पाटोदा, पारगावघुमरा, दिघोळला जोडला जाऊन पुढे तो खर्डा मार्गे पंढरपूरकडे जाणारा आहे.

सदरील मार्गाचे काम सुरू होऊन आठ वर्षे उलटली तरीही अनेक ठिकाणी सदरील रस्त्याचे काम अर्धवट आहेत. (High Court) अनेक ठिकाणी रस्ता खोदल्याने लोकांना धुळीचा व खड्ड्याचा प्रचंड त्रास होत आहे. सदर मार्गामुळे या भागातील लोकांना दळणवळणासाठी आणि मुख्यतः वारकऱ्यांना पैठण ते पंढरपूर वारीसाठी सोयीचे होणार आहे.

मात्र सदरील काम संबंधित ठेकेदार तसेच अधिकाऱ्यांच्या हलगर्जीपणामुळे रखडलेले आहे. त्यामुळे पाटोदा येथील नागरिक महादेव नागरगोजे तसेच ह.भ.प. रामकृष्ण रंधवे, लक्ष्मणराव जाधव यांनी ॲड. नरसिंह लक्ष्मणराव जाधव यांच्या मार्फतखंडपीठात याचिका दाखल केली. त्यावेळी पैठण-पंढरपूर महामार्गाचे काम 31 डिसेंबर 2024 पर्यंत पुर्ण करण्याचे आदेश खंडपीठाने दिले होते.

परंतू त्यानंतरही मुदतीत काम झालेच नाही, म्हणून पुन्हा अवमान याचिका दाखल केली. प्राथमिक सुनावणीत प्रतिवादी राष्ट्रीय महामार्ग कार्यकारी अभियंता एस. एल. गलांडे, मुख्य अभियंता राजीव सिंग यांना खंडपीठाने नोटीस बजावल्या आहेत. पुढील सुनावणी 6 ऑगस्ट रोजी ठेवली आहे. याचिकाकर्त्यातर्फे ॲड. नरसिंह जाधव यांनी काम पाहिले. त्यांना सहकार्य ॲड. रविंद्र वानखेडे, ॲड. गौरव शिवाजीराव खांडे यांनी सहकार्य केले. शासनातर्फे ॲड. एस. आर. वाकळे यांनी काम पहिले.