Pankaja Munde Dasara Melava 2023 : पंकजा मुंडे भगवान भक्तीगडावर दाखल; कार्यकर्त्यांना काय संदेश देणार?

Beed News : दसऱ्यानिमित्त होणाऱ्या मेळाव्यासाठी भगवान भक्तीगड भाविकांच्या गर्दीने फुलून गेला आहे. माजी मंत्री पंकजा मुंडे या पांगरी (ता. परळी) येथील गोपीनाथ गडावरून हेलिकॉप्टरने भगवान भक्तीगडावर दाखल झाल्या आहेत. त्या काय बोलणार, भारतीय जनता पक्षात होणाऱ्या घुसमटीवर काय भाष्य करणार, याकडे संपूर्ण महाराष्ट्राचे लक्ष लागले आहे. (Pankaja Munde (Bhagwangad): Pankaja Munde entered Bhagwan Bhaktigarh)

भगवान गडावरील दसरा मेळाव्याला गडाच्या मठाधिपतींकडून नकार आल्यानंतर पंकजा मुंडे यांनी २०१५ मध्ये भगवान गडाच्या पायथ्याला आणि पुढच्या वर्षी २०१६ पासून संत भगवान बाबांचे जन्मगाव भगवान भक्तीगडावर पंकजा मुंडे दसरा मेळावा घेत आहेत. यंदा या मेळाव्याचे आठवे वर्ष आहे. कोविडचा कालावधी सोडता गडावर मेळाव्याला गर्दी कायम असते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दरम्यान, पांगरी येथील गोपीनाथ गडावरून पंकजा मुंडे नुकत्याच हेलिकॉप्टरने दाखल झाल्या आहेत. सावरगाव, चिखली, चिंचोली, मूगगाव येथील ग्रामस्थांकडून त्यांचे स्वागत होत आहे. त्या राष्ट्रसंत भगवान बाबा मंदिरात दर्शन व आरती करून त्या राष्ट्रसंत भगवान बाबा यांच्या भव्य मूर्तीस क्रेनने हार घालणार आहेत. थोड्या वेळाने पंकजा मुंडे यांचे मुख्य भाषण होणार आहे.

दरम्यान, दसरा मेळाव्याआधी पंकजा मुंडे, प्रीतम मुंडे आणि मुंडे कुटुंबीयांनी परळीतील वैद्यनाथाचे दर्शन घेतले. त्यानंतर मुंडे कुटुंबीय हे दसरा मेळाव्यासाठी भगवान भक्तीगडावर दाखल झाल्या आहेत. या दसरा मेळाव्यात पंकजा मुंडे काय बोलणार याकडे सर्वांचे लक्ष लागले आहे. आपल्या कार्यकर्त्यांना त्या कोणता संदेश देतात का, हेही पाहावे लागणार आहे.

पंकजा मुंडे यांचा वैद्यनाथ सहकारी साखर कारखाना सध्या आर्थिकदृष्ट्या अडचणीत आहे. याशिवाय जीएसटी विभागानेही त्यांच्या कारखान्यावर जप्तीची कारवाई केली होती. राज्य सरकारने सोमवारी काही कारखान्यांची थकहमीची जबाबदारी घेतली आहे. मात्र, त्यात पंकजा मुंडे यांचा कारखाना नाही, त्यामुळे भाजप सरकारकडून आर्थिक मदतीसाठी पंकजा मुंडे यांचा कारखाना पुन्हा डावलण्यात आलेला आहे, त्यासंदर्भातही त्या काय बोलतात, याकडे राजकीय वर्तुळाचे लक्ष असणार आहे.