Parbhani Shivsena UBT : ठाकरेंना मोठा धक्का! तब्बल 82 पदाधिकाऱ्यांनी दिले राजीनामे, 'त्या' नेत्याची हकालपट्टी करणं पक्षाला भोवणार?

Parbhani News, 06 May : ठाकरेंच्या शिवसेनेचे परभणीचे खासदार संजय जाधव यांचे निकटवर्तीय असलेले माजी जिल्हाप्रमुख गंगाप्रसाद आनेराव यांची पक्षातून हकालपट्टी केल्याचे पडसाद आता परभणीत उमटायला सुरूवात झाली आहे.

शिवसेनेतील तब्बल 82 पदाधिकाऱ्यांनी आपले राजीमाने दिले आहेत. या राजीनाम्यांमुळे ठाकरेंच्या शिवसेनेत एकच खळबळ उडाली असून पक्षासाठी हा मोठा धक्का मानला जात आहे. मागील काही दिवसांपासून परभणीत ठाकरेंच्या शिवसेनेत मोठ्या हालचाली घडताना दिसत आहेत.

खासदार संजय जाधव यांच्या विधानामुळे पक्षातील नेत्यांमध्ये चलबिचल सुरू होती. अशातच ठाकरेंच्या शिवसेनेचे नेते गंगाप्रसाद आनेराव हे शिवसेना भवन येथे आयोजित बैठकीला गैरहजर असल्यामुळे त्यांच्यावर कारवाई करत त्यांना पदावरून हटवलं.

यामुळे अनेक पदाधिकाऱ्यांमध्ये नाराजी निर्माण झाली आणि याच नाराजीतून आता त्यांनी राजीनामे दिले आहेत. आनेराव हे खासदार संजय जाधवांचे जवळचे सहकारी असून संजय जाधव हे ठाकरेंची साथ सोडण्याची चर्चा सुरू असल्यामुळे ठाकरेंनी कारवाई करत आनेराव यांनाच पदावरून हटवलं होतं.

मात्र या निर्णयाचे उलटे पडसाद उमटताना दिसत आहेत. शिवाय येत्या आठ दिवसात ठाकरेंनी निर्णय मागे घेतला नाही तर या पदाधिकाऱ्यांनी सदस्यपदाचा राजीनामा देण्याचाही इशारा दिला आहे. त्यामुळे आता पक्षप्रमुख उद्धव ठाकरे यावर नेमका काय तोडगा काढणार? हे पाहणं महत्त्वाचं ठरणार आहे.