Babajani Durrani : 17 वर्षे आमदार राहिलेला नेता नगरपालिकेत स्वीकृत नगरसेवक; जिथून सुरुवात झाली तिथूनच राजकारण वाचवण्याची धडपड
Parbhani Politics : राज्यातील फडणवीस सरकारने नगराध्यक्षांना दिलेल्या अतिरिक्त मताधिकाराचा निर्णय पाथरी नगरपालिकेत शिवसेनेच्या पथ्यावर पडला आहे. उपनगराध्यक्ष निवडीत काँग्रेस आणि शिवसेनेच्या उमेदवाराला समान मते मिळाली. त्यानंतर नगराध्यक्षांनी आपल्या मताधिकाराचा वापर करत शिवसेनेच्या अलोक चौधरी यांच्या पारड्यात आपले मत टाकले आणि त्यांची उपनगराध्यक्ष पदी निवड जाहीर करण्यत आली.
दुसरीकडे पाथरी नगरपालिकेवर तब्बल 35 वर्ष अधिराज्य गाजवलेल्या माजी आमदार तथा काँग्रेसचे जिल्हाध्यक्ष बाबाजानी दुर्राणी यांच्यावर स्वीकृत सदस्य म्हणून नगरपालिकेत मागच्या दाराने जाण्याची नामुष्की ओढावली. पाथरी नगरपालिकेत स्वतः बाबाजानी 10 वर्ष, त्यांच्या पत्नी 5 वर्ष, तर पुतण्या आणि मुलगा प्रत्येकी अडीच वर्ष नगराध्यक्ष होते. इतकी वर्ष घरातच सत्ता राखल्यानंतरही बाबाजानी यांचा जीव नगरपालिकेत अडकला आणि त्यांनी स्वीकृत सदस्य होणे मान्य केले.
पाथरी पालिकेच्या उपनगराध्यक्षपदी शिवसेनेचे अलोक चौधरी, तर स्वीकृत सदस्य म्हणून माजी आमदार बाबाजानी दुर्राणी आणि माजी नगराध्यक्ष मोईज अन्सारी यांची निवड झाली आहे. उपनगराध्यक्ष, स्वीकृत सदस्य निवडीसाठी नगराध्यक्ष आसेफ खान यांच्या अध्यक्षतेखाली पहिली सर्वसाधारण सभा घेण्यात आली. यात उपनगराध्यक्षपदासाठी शिवसेनेकडून अलोक चौधरी व काँग्रेस पक्षाकडून हतीम अन्सारी यांचे उमेदवारी अर्ज दाखल झाले.
निकालात काँग्रेसचे 11, शिवसेनेचे 9 आणि राष्ट्रवादी 2 सदस्य विजयी झाले आहेत. यावेळी हात उंचावून मतदान घेण्यात आले. यात दोन्ही उमेदवारांना समान मते मिळाली. यावेळी नगराध्यक्षांनी त्यांचे मत अलोक चौधरी यांच्या पारड्यात टाकल्याने ते एका मताने विजयी झाल्याचे घोषित करण्यात आले. स्वीकृत सदस्यपदासाठी काँग्रेसच्या (Congress) वतीने माजी आमदार बाबाजानी दुर्राणी व राष्ट्रवादी काँग्रेसचे माजी नगराध्यक्ष मोईज अन्सारी यांचा एक -एक अर्ज आल्याने नगराध्यक्ष आसेफ खान यांनी त्यांना विजयी घोषित केले.
दुर्राणी पुन्हा सभागृहात
काँग्रेस पक्षाच्या वतीने स्वीकृत सदस्य म्हणून माजी आमदार बाबाजानी दुर्राणी यांची निवड करण्यात आली. 5 वर्षे विधानसभा व 12 वर्ष विधान परिषदेत काम करणारे माजी आमदार दुर्राणी आगामी काळात पालिकेच्या सभागृहात दिसून येणार आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.