Sillod Assembly Election : निवडून आल्यानंतरही सत्तारांची साडेसाती संपेना; सिल्लोड न्यायालयात याचिका दाखल

छत्रपती संभाजीनगर : शिवसेनेचे माजीमंत्री अब्दुल सत्तार हे यावेळी कसबसे निवडून आले. महाविकास आघाडीचे सुरेश बनकर यांनी सत्तार यांना शेवटपर्यंत झुंजवले आणि अवघ्या 2420 मतांनी त्यांचा विजय झाला. निवडणुक मतमोजणी दरम्यान अब्दुल सत्तार यांनी घोळ केल्याची चर्चा मतदारसंघात अजूनही सुरू आहे. अशातच सत्तार यांच्या निवडीला आव्हान देणारी याचिका सिल्लोड दिवाणी तथा फौजदारी न्यायालयात दाखल करण्यात आली आहे.

भराडी येथील निम्न प्रकल्पाला मुंबई उच्च न्यायालयाच्या औरंगाबाद खंडपीठाने नुकतीच स्थगिती दिली. पाचशे कोटींहून अधिकचा हा महत्वाकांक्षी प्रकल्प स्थगित झाल्यामुळे सत्तार बॅकफुटवर गेले असताना आता त्यांना आणखी एका नव्या आव्हानाला सामोरे जावे लागणार आहे. (Abdul Sattar) अब्दुल सत्तार यांच्याविरोधात सिल्लोड न्यायालयात फौजदारी याचिका दाखल करण्यात आली आहे. निवडणूक शपथपत्रात खोटी माहिती दिल्याप्रकरणी ही याचिका दाखल करण्यात आली आहे.

सामाजिक कार्यकर्ते महेश शंकरपेल्ली आणि पुणे येथील डॉ. अभिषेक हरिदास यांनी अब्दुल सत्तार यांच्या नामनिर्देशन पत्रा सोबत सादर केलेल्या शपथपत्रावर मतदानापूर्वीच लेखी आक्षेप घेतला होता. (Shivsena) निवडणूक आयोगाने यावर अद्याप कारवाई केलेली नाही. त्यामुळे शपथपत्रात खोटी, भ्रामक आणि दिशाभूल करणारी माहिती देणे हा लोकप्रतिनिधी अधिनियम 1951 कलम 125 अ नुसार गुन्हा आहे.

तक्रारीबाबत आयोगाने कोणतीच कारवाई न केल्यामुळे या प्रकरणात सिल्लोड न्यायालयात फौजदारी याचिका दाखल करण्यात आली आहे. अब्दुल सत्तार यांनी प्रत्येक निवडणुकीत खोटी माहिती देऊन निवडणूक लढवली आहे. मतदारांची फसवणूक होऊन मानवाधिकार हक्काचा भंग होत आहे, असा आरोप याचिकेत करण्यात आला आहे. याचिकेत अब्दुल सत्तार अब्दुल नबी व निवडणूक निर्णय अधिकारी लतीफ इब्राहिम पठाण यांना प्रतिवादी बनविण्यात आले आहे.

काही दिवसापूर्वी महेश शंकरपेल्ली यांनी अब्दुल सत्तार यांच्या निवडणूक शपथपत्रातील चुका असल्याचे सांगत त्यांची उमेदवारी रद्द करण्याची मागणी निवडणूक आयोगाकडे केली होती. यात त्यांनी सत्तारांनी शपथपत्रात दाखवलेल्या मालमत्तेचा तपशील आणि प्रत्यक्ष मालमत्ता यामध्ये तफावत आहे. अनेक मालमत्तांचे क्षेत्रफळ हे चुकीचे दाखवण्यात आले आहे. काही मालमत्तेची माहिती शपथ पत्रातून गायब करण्यात आली आहे.

विविध सहकारी संस्थांमध्ये सत्तार त्यांच्याकडे असलेल्या शेअर्सबाबतही खोटी माहिती देण्यात आली असल्याचा आरोप केला होता. राज्यातील नव्या सरकार स्थापनेच्या हालचालींना वेग आला आहे. कोणाला मंत्री करायचे याच्या याद्या महायुतीतील घटक पक्ष असलेल्या शिवसेना-राष्ट्रवादीकडून तयार केल्या जात आहे. अशा महत्वाच्या वेळी सत्तार यांच्याविरोधात न्यायालयात याचिका दाखल झाल्याने त्यांची डोकेदुखी वाढणार आहे.