Jalna Sambhajinagar election : प्राजक्त तनपुरेंसोबत राजेश टोपेंचाही भाजपप्रवेश होणार? अखेर सत्य समोर आले, मिळाली नेमकी माहिती!

सुभाष बिडे

Jalna News : जालना-छत्रपती संभाजीनगर स्थानिक स्वराज्य संस्था मतदारसंघासाठी महायुतीतील भाजपा-शिवसेनेत जोरदार खडाजंगी सुरू आहे. विधान परिषदेच्या 17 पैकी 16 जागांचे वाटप झाले असले तरी या मतदारसंघाचा तिढा अजून सुटलेला नाही. यातच राष्ट्रवादी काँग्रेस शरदचंद्र पवार पक्षाचे नेते माजी मंत्री राजेश टोपे यांच्या भाजप प्रवेशाच्या आणि जालना-संभाजीनगर स्थानिक स्वराज्य संस्थेच्या मतदारसंघातून त्यांना उमेदवारी मिळणार असल्याच्या चर्चांना उधाण आले आहे.

या सर्व चर्चा फेटाळून लावत आपल्या भाजप प्रवेशाबद्दल होणाऱ्या चर्चा व सोशल मिडियावरील बातम्या या निराधार, चुकीच्या असल्याचे राजेश टोपे यांनी म्हटले आहे. शिवाय टोपे हे अंकुशनगर येथील समर्थ सहकारी साखर कारखाना आणि घनसावंगी मतदारसंघातच आहेत. त्यामुळे त्यांचा मुंबईत भाजपत प्रवेश होणार, त्यांना उमेदवारी मिळणार या केवळ चर्चा असल्याचे टोपे यांनी स्पष्ट केले आहे.

दरम्यान, राजेश टोपे (Rajaesh Tope) भाजपमध्ये प्रवेश करण्यासाठी इच्छुक आहेत. त्यांनी तशी तयारीही केली आहे. जिल्ह्याच्या राजकारणात भाजपविरोधही मवाळ केला आहे. पण ज्याप्रमाणे तनपुरे यांना शब्द मिळाला, तसा टोपे यांना भविष्यातील राजकारणाचा कोणातही शब्द मिळालेला नाही. भाजपच्या वरिष्ठ नेत्यांकडून टोपे यांना विधानसभा निवडणुकीची तयारी करण्याचाच सल्ला देण्यात येत असल्याची माहिती आहे. त्यामुळेच टोपे कधी भाजपमध्ये प्रवेश करणार हे अद्यापही निश्चित झालेले नाही. मात्र आज त्यांचा भाजपप्रवेश होणार नाही हे निश्चित मानले जात आहे.

विधान परिषदेसाठी उमेदवारी अर्ज दाखल करण्यासाठी शेवटचे दोन दिवस शिल्लक आहेत. अशातच महाराष्ट्राच्या राजकारणात पक्षांतराचे वारे वाहू लागले आहे. शरद पवार यांच्या राष्ट्रवादी काँग्रेस पक्षाचे नेते आणि माजी आमदार प्राजक्त तनपुरे हे भाजपमध्ये प्रवेश करणार आहेत. त्याचबरोबर माजी मंत्री राजेश टोपे हे भाजपमध्ये प्रवेश करणार असल्याच्या चर्चांना उधाण आले आहे.

जालन्यातील घनसावंगी मतदारसंघाचे प्रमुख नेते आणि राज्याचे माजी आरोग्य मंत्री राजेश टोपे हे भाजपमध्ये (BJP) प्रवेश करण्याची शक्यता वर्तवली जात आहे. जून 2026 मध्ये होत असलेल्या विधान परिषदेच्या निवडणुकीत जालना-छत्रपती संभाजीनगर स्थानिक स्वराज्य संस्था मतदारसंघातून ते भाजपच्या तिकिटावर विधान परिषद लढवतील, असे बोलले जाते. मात्र, राजेश टोपे यांनी अशी कुठलीही शक्यता नसल्याचे सांगत हे वृत्त फेटाळले.

टोपे यांनी यापूर्वी पक्ष सोडण्याचे वृत्त फेटाळले असले, तरी सध्याची बदललेली राजकीय परिस्थिती पाहता ते देखील भाजपचा मार्ग धरू शकतात, असे संकेत मिळत आहेत. एका बाजूला मराठा आरक्षणाचे आंदोलन सुरू असतानाच, राजेश टोपे यांच्या संभाव्य भाजप प्रवेशाच्या चर्चेने जालना जिल्ह्याच्या राजकारणात खळबळ उडाली आहे. याबाबत खुद्द टोपे यांनीच भाजप प्रवेशाच्या माझ्याबाबत येणाऱ्या बातम्या चुकीच्या आहेत. मी कुठेही जाणार नाही, असे स्पष्ट केले आहे.