Imtiaz Jaleel News : संजय शिरसाट यांच्या खात्यामध्ये दीड नाही दोन हजार कोटींचा घोटाळा! मुख्यमंत्र्यांच्या लाडक्या आमदाराचाही सहभाग

Aimim News : सामाजिक कार्यकर्त्या अंजली दमानिया यांनी समाज कल्याण विभागात दीड हजार कोटींचा टेंडर घोटाळा झाल्याचे म्हटले होते. पण हा घोटाळा दोन हजार कोटींचा असल्याचा आरोप करत एमआयएमचे माजी खासदार इम्तियाज जलील यांनी याची उच्चस्तरीय चौकशीची मागणी केली. या घोटाळ्यात ज्या तीन एजन्सीजवर आरोप आहेत, त्यापैकी एक मुख्यमंत्र्यांच्या लाडक्या आमदाराची असल्याचा दावा करत इम्तियाज यांनी भाजप आमदार प्रसाद लाड यांचे थेट नावच घेतले.

एमआयएमचे प्रदेशाध्यक्ष इम्तियाज जलील (Imtiaz Jaleel) यांनी एकापाठोपाठ एक असे घोटाळे आणि गैरव्यवहाराची प्रकरणं बाहेर काढायला सुरवात केली आहे. राज्याचे सामाजिक न्याय मंत्री तथा जिल्ह्याचे पालकमंत्री संजय शिरसाट यांच्यावर हाॅटेल व्हिट्स खरेदी प्रकरण, एमआयडीसीतील प्लाट, शहरालगत जमीन, भुखंड यावरून इम्तियाज यांनी गंभीर आरोप करत त्यांच्या चौकशीची मागणी सीबीआय, आयकर विभाग, ईडी, अॅन्टीकरप्शन विभागाकडे केली. मुख्यमंत्र्यांकडेही या प्रकरणातील पुरावे देण्यासाठी वेळ मागितली होती.

इम्तियाज जलील यांच्या तक्रारीनंतरच हाॅटेल खरेदी प्रकरणात मुख्यमंत्री देवेंद्र फडणवीस (Devendra Fadnavis) यांनी उच्चस्तरीय चौकशी जाहीर केली. तर आयकर विभागाने संजय शिरसाट यांना संपतीत वाढ कशी झाली? याची विचारणा केली होती. त्यानंतर आता इम्तियाज जलील यांनी पुन्हा एकदा शिरसाट मंत्री असलेल्या समाज कल्याण विभागातील टेंडर घोटाळा कसा झाला? याची माहिती पुराव्यासह पत्रकार परिषदेत दिली.

समाज कल्याण विभागामध्ये जितके पैसे मुलांवर खर्च करतात, त्यापेक्षा जास्त ठेकेदारांवर केले जातात. विद्यार्थ्यांना जेवण देण्यासाठी दिले गेलेले टेंडर रिंग करून तीन एजन्सीजला देण्यात आले होते. या एजन्सीज राजकीय नेत्यांच्या जवळच्या लोकांच्या आहेत. यात मुख्यमंत्री देवेंद्र फडणवीस यांचे लाडके आमदार प्रसाद लाड यांच्या कुटुंबातील व्यक्तीचा सहभाग असल्याचा आरोप इम्तियाज यांनी केला. याशिवाय उपमुख्यमंत्री एकनाथ शिंदे, अजित पवार यांच्या जवळच्या व्यक्तींचाही या एजन्सीशी थेट संबंध असल्याचा दावा त्यांनी केला.

समाज कल्याण विभागाने या 3 कंत्राटदारांना काम मिळावे म्हणून नियम बदलले. सर्व्हिस चार्जच्या आधारे टेंडर देण्यात आले, आणि 2013 पासून जे काम करत होते त्यांना टेंडर मिळाले. सर्विस चार्ज तिन्ही कंपन्यांनी दिला आणि टेंडर मंजूर झाले. एक एजन्सी भाजप आमदार प्रसाद लाड यांची आहे. माझी मागणी आहे, याची मुख्यमंत्र्यांनी उच्चस्तरीय चौकशी लावावी. या आधी हे खाते एकनाथ शिंदे यांच्याकडे होते, असेही इम्तियाज जलील म्हणाले.