Santosh Bangar News : युतीसाठी हात पसरण्याची गरज नाही, ते आपल्यामागे आले पाहिजे असे काम करा; संतोष बांगर यांनी घातले साकडे

Shivsena UBT News : शिवसेनेची ताकद मोठी आहे, आपापल्या भागात, मतदारसंघात असे काम करा, की युतीसाठी आपल्याला कोणासमोर हात पसरण्याची वेळ येता कामा नये. ते आपल्यामागे आले पाहिजे, असे आवाहन शिवसेनेचे आमदार संतोष बांगर यांनी शिवसेनेच्या संभाजीनगर येथील बैठकीत पदाधिकारी, शिवसैनिकांना केले.

मतदार याद्या दुरुस्ती एसआयआर संदर्भात काम करताना फक्त जिथे आपला आमदार, खासदार, मंत्री, जिल्हा परिषदेचा अध्यक्ष, पंचायत समिती सभापती आहे, तिथेच काम करा, हे सांगणे बरे नाही. भविष्यात काय परिस्थिती ओढावेल हे सांगता येत नाही. त्यामुळे राज्यातील सर्व 288 विधानसभा मतदारसंघात शिवसेनेचे (shivsena) काम झाले पाहिजे. ऐनवेळी सगळ्या मतदारसंघात निवडणूक लढवण्याची वेळ आली तर? असा सवाल करत बांगर यांनी उपमुख्यमंत्री एकनाथ शिंदे हे परिस्थिती ओळखून असल्याचे सांगितले.

केवळ बीएलओवर जबाबदारी सोपवून काम होणार नाही. जिल्हाप्रमुख, स्थानिक नेत्यांनी यात लक्ष घातले तरच हे शक्य होईल. काटेकोरपणे काम करावे लागेल. आमदार, खासदार, मंत्री नेत्यांनी खालच्या पदाधिकाऱ्यांना ताकद दिली पाहिजे. हे सगळे लोक आपल्यासाठी रात्रंदिवस झेंडे उचलतात. आपल्याला आमदार, खासदार, मंत्री करण्यासाठी ते झटत असतात. पण आपण निवडून आलो की, कार्यकर्त्यांवर कधी हरळी फुटते हे कळत नाही. आपण रात्रंदिवस कार्यकर्त्यांना फोन करतो, पण निवडणूक झाल्यानंतर नेता, कार्यकर्त्याचा विचार करत नाही, असा घरचा आहेर बांगर यांनी बैठकीत दिला.

वस्तुस्थिती बोलली पाहिजे, आपले मतदार दुसरीकडे वळत आहेत. आपल्याला काळजी घ्यावी लागले. एकनाथ शिंदे (Eknath Shinde) यांना वस्तुस्थिती माहित आहे. मा‍झ्या जिल्ह्यात तीनही नगरपालिकेवर भगवा फडकला आहे, जिल्हा परिषदेचा अध्यक्ष, पंचायत समिती, बाजार समितीवर करकरीत म्हणजे छत्रपती शिवाजी महाराजांचा भगवा फडकला आहे. आपल्या भागात असे काम करा, की त्यांना आपली गरज पडली पाहिजे, आपण त्यांच्याकडे युतीसाठी हात पसरण्याची गरज नाही, असे आवाहनही बांगर यांनी केले.

युवा सेनेची भूमिका यामध्ये महत्त्वाची असणार आहे. युवा सैनिकांनी घराघरात गेले पाहिजे. उमेदवार कोणी असला तरी तो निवडून येईल, असे काम आपल्याला करावे लागेल. कोणत्या नेत्यांची शिवसेना तयार होता कामा नये, ती फक्त बाळासाहेबांची आणि एकनाथ शिंदे यांची असली पाहिजे. काटेकोर, तंतोतंतपणे काम करा, तयारी अशी करा, की समोरचा नामोहरम झाला पाहिजे, अशा शब्दात बांगर यांनी उपस्थितांना सूचना दिल्या.