Santosh Bangar Viral Video : लोकशाहीची चाड ठेवा! CM फडणवीस संतोष बांगर यांच्यावर प्रचंड संतप्त; आयोगाकडूनही तातडीने दखल

Hingoli News : शिवसेनेचे आमदार संतोष बांगर यांचा कळमनुरी येथील एका मतदान केंद्रावर मतदान करणाऱ्या महिलेला मार्गदर्शन करतानाचा व्हिडिओ सकाळी व्हायरल झाला. मतदानाबद्दल बाळगण्यात येणाऱ्या गोपनीयतेचा हा भंग आहे, अशी टीका बांगर यांच्यावर होऊ लागली. एवढेच नाही तर मतदान केंद्रात बंदी असताना मोबाईलचा वापर आणि घोषणबाजी केल्याचा प्रकारही यावेळी घडल्याचे सांगितले जाते. या प्रकारावर मुख्यमंत्री देवेंद्र फडवीस यांनी संताप व्यक्त केला आहे. माध्यमांशी बोलताना त्यांनी बांगर यांना अत्यंत कडक शब्दात फटकारले.

फडणवीस म्हणाले, किमान लोकप्रतिनिधींनी लोकशाहीची चाड ठेवली पाहिजे. निवडणुकीत आपण कसं वागतोय, आपण कोणता संदेश देतोय याचा विचार केला पाहिजे, अशा शब्दात त्यांनी बांगर यांना खडेबोल सुनावले आहे. दरम्यान, बांगर यांचा व्हिडिओ समोर आल्यानंतर निवडणूक निर्णय अधिकाऱ्यांनी या प्रकरणाची गंभीर दखल घेतली आहे. या संदर्भात तातडीने अहवाल मागवून निवडणूक निर्णय अधिकाऱ्यांनी बांगर यांच्यावर गुन्हा दाखल करण्याचे आदेश दिले आहेत.

स्थानिक स्वराज्य संस्थांच्या निवडणुकीसाठी आज सकाळपासून मतदानाला सुरुवात झाली. हिंगोलीतील कळमनुरीच्या बाजार परिसरातील मतदान केंद्र क्रमांक 3 वर सकाळी संतोष बांगर मतदानासाठी पोहोचले होते. मतदान केंद्रात शिरताच त्यांनी एका महिला मतदाराला प्रत्यक्ष ईव्हीएम बटन दाबताना मार्गदर्शन केल्याचा प्रकार व त्याचा व्हिडिओ समाज माध्यमांवर व्हायरल झाला.

बाळासाहेब ठाकरेंचा विजय असो, एकनाथ शिंदे आगे बढ़ो हम तुम्हारे साथ हैं, अशा घोषणाही यावेळी त्यांच्या समर्थकांकडून देण्यात आल्याचा संतापजनक प्रकार समोर आला. मतदान केंद्रात मोबाईल वापराला बंदी असतान मोबाइल फोनचा वापर करण्यात आला. घोषणाबाजी, मतदाराला कोणतीही सूचना देणे हा प्रकार निवडणूक गोपनीयतेचा भंग आणि आचारसंहितेचे उल्लंघन मानले जाते. त्यामुळे आमदार संतोष बांगर यांच्यावर कारवाईची मागणी विरोधकांकडून होऊ लागली आहे.