Maharashtra Politics : 'दुःख आहेच, पण दादांची उणीव अधिक वेदनादायी'; निवडणुकीतील पराभवानंतर सलग तीन टर्म आमदार राहिलेले सतीश चव्हाण स्मृतिस्थळी भावुक

Baramati News : मराठवाडा पदवीधर मतदारसंघाच्या निवडणुकीत पराभव स्वीकारावा लागल्यानंतर माजी आमदार सतीश चव्हाण यांनी आज बारामतीतील विद्या प्रतिष्ठान परिसरात स्व. अजितदादा पवार यांच्या स्मृतिस्थळाला भेट देत अभिवादन केले. “निवडणुकीतील पराभवाचे दुःख आहेच; मात्र त्यापेक्षाही दादांच्या अनुपस्थितीची जाणीव अधिक वेदनादायी आहे,” अशी भावनिक भावना चव्हाण यांनी यावेळी व्यक्त केली.

सतीश चव्हाण यांनी सलग तीन टर्म, म्हणजेच १८ वर्षे मराठवाडा पदवीधर मतदारसंघाचे प्रतिनिधित्व केले. मात्र, यंदाच्या निवडणुकीत मतदारांचा कौल त्यांच्या विरोधात गेल्याने त्यांना पराभव स्वीकारावा लागला. “निवडणुकीतील जय-पराजय हा लोकशाहीचा भाग आहे,” असे सांगत चव्हाण यांनी निकालाचा स्वीकार केला.

निवडणुकीत दादांची उणीव प्रकर्षाने जाणवली

निवडणुकीच्या संपूर्ण प्रक्रियेदरम्यान अजितदादांची उणीव प्रकर्षाने जाणवल्याचे चव्हाण यांनी सांगितले. “दादा असते, तर कदाचित परिस्थिती वेगळी असती,” अशी भावना त्यांनी व्यक्त केली. अजितदादा हे केवळ नेते नव्हते, तर आपल्या राजकीय प्रवासातील आधारस्तंभ होते, असेही त्यांनी नमूद केले.

दादांनी वेळोवेळी दिलेली साथ, केलेले मार्गदर्शन, दाखवलेला विश्वास आणि कठीण प्रसंगी पाठीशी उभे राहण्याची त्यांची वृत्ती यांची आठवण चव्हाण यांनी यावेळी काढली. त्यांच्या नेतृत्वामुळे अनेक संकटांना सामोरे जाण्याचे बळ मिळाल्याचे त्यांनी सांगितले.

दादांचे विचारच पुढील वाटचालीचा आधार

स्मृतिस्थळासमोर नतमस्तक होताना आमदार सतीश चव्हाण भावुक झाले. “दादांची साथ असताना प्रत्येक संकटाला सामोरे जाण्याचे बळ मिळायचे. आज ते आपल्यात नाहीत; मात्र त्यांच्या आठवणी, विचार आणि शिकवण हाच पुढील वाटचालीचा आधार आहे,” असे ते म्हणाले.

अजितदादांची उणीव कधीही भरून निघणार नाही, अशी भावना व्यक्त करत चव्हाण यांनी त्यांना अभिवादन केले. निवडणुकीतील पराभवाचा स्वीकार करतानाच दादांच्या आठवणींनी मन अधिक व्याकूळ झाल्याचे त्यांच्या भावनिक वक्तव्यातून स्पष्ट झाले.