Danve-Shinde News : अहो, त्यागमूर्ती..! अंबादास दानवेंनी एकनाथ शिंदेंना पुन्हा एकदा डिवचलं

छत्रपती संभाजीनगर : नुकत्याच झालेल्या विधानसभा निवडणुकीत महायुतीला 200 पार जागा मिळाल्या. लोकसभा निवडणुकीत दारुण पराभव झाल्यानंतर भाजप महायुतीने जोरदार कमबॅक केले. या विजयाचा आनंद साजरा होत असताना महायुतीच्या तीनही नेत्यांचे टेन्शन मात्र सध्या वाढलेले दिसते. निवडणुकीचा निकाल लागून आठवडा होत आला आहे मात्र अजूनही मुख्यमंत्री कोण होणार? हे ठरलेले नाही.

अनेक नावांच्या चर्चा होत असताना काळजीवाहू मुख्यमंत्री एकनाथ शिंदे (Eknath Shinde) यांनी दोन दिवसांपूर्वी पत्रकार परिषद घेऊन सरकार स्थापनेत आपला कोणताही अडथळा असणार नाही, असे स्पष्ट करत मुख्यमंत्रीपदाच्या शर्यतीतून आपण बाद झाल्याची संकेत दिले. त्यानंतर मुंबई आणि दिल्लीत बैठकांचे सत्र सुरू आहे.

या पार्श्वभूमीवर शिवसेनेचे नेते तथा विधान परिषदेचे विरोधी पक्ष नेते अंबादास दानवे (Ambadas Danve) यांनी एकनाथ शिंदे, देवेंद्र फडणवीस आणि अजित पवार यांच्या एकत्रित फोटोवर भाष्य करत शिंदे यांना टोला लगावला आहे. महायुती सत्तेत आल्यानंतर ज्या पद्धतीने एकनाथ शिंदे व त्यांच्या शिवसेनेला भाजपकडून वागणूक दिली जात आहे त्यावर दानवे यांनी शिंदेंना सुनावण्याची संधी साधली.

अंबादास दानवे यांनी आपल्या सोशल मीडियावरील पेजवरून संभाव्य मुख्यमंत्री देवेंद्र फडणवीस हे उपमुख्यमंत्री अजित पवार यांना पेढा भरवत असल्याचे छायाचित्र पोस्ट केले आहे. यामध्ये एकनाथ शिंदे मध्यभागी उभे राहून हा पेढे भरवण्याचा कार्यक्रम पाहत आहेत. यावर त्रिमूर्ती आणि मधोमध 'त्यागमूर्ती' असा टोला दानवे यांनी एकनाथ शिंदेंना लगावला.

लोकसभा निवडणुकीत राज्यात महायुतीला अपेक्षित यश मिळाले नाही. त्यानंतर लगेचच विधानसभा निवडणुकीच्या जागावाटपाची बोलणी वरिष्ठ पातळीवर सुरू होती. दिल्लीत अमित शहा यांच्यासोबत झालेल्या बैठकीत जागा वाटपामध्ये 'त्यागा'ची तयारी ठेवा, असा सूचक संदेश एकनाथ शिंदे यांना देण्यात आल्याची त्यावेळी चर्चा होती.

यावरून महाविकास आघाडी आणि महायुतीच्या नेत्यांमध्ये बराच कलगीतुराही रंगला होता. विधानसभा निवडणुकीतील यशानंतरही एकनाथ शिंदे यांना भाजपने खड्यासारखे बाजूला ठेवले, ज्यांच्या नेतृत्वात निवडणुका लढल्या आणि जिंकल्या त्या शिंदे यांना आता मुख्यमंत्रीपदावरून बाजूला करण्यात आले आहे. या सगळ्या घडामोडींच्या पार्श्वभूमीवर अंबादास दानवे यांनी एकनाथ शिंदे यांना 'त्यागमूर्ती' असे म्हटले आहे.