Suresh Dhas : मुख्यमंत्र्यांआधीच सुरेश धस यांनी संतोष देशमुख हत्याप्रकरणी दिली मोठी माहिती; तपासाला वेग येणार

Beed News : मस्साजोगचे सरपंच संतोष देशमुख यांची हत्या होऊन महिना उलटला आहे. तरी या प्रकरणातील एक आरोपी फरार आहे. तर दुसरीकडे मोक्काचा गुन्हा दाखल करण्यासाठी दिरंगाई केली जात असल्याने आक्रमक झालेल्या ग्रामस्थानी सोमवारी आंदोलन केले. यावेळी धनंजय देशमुख यांनी पाण्याच्या टाकीवर चढून आंदोलन केले. संतोष देशमुखांच्या हत्येप्रकरणचा मास्टरमाईंड वाल्मिक कराड असल्याचा आरोप त्यांनी केला. त्यामुळे वाल्मिक कराडवर मोक्का लावावा, अशी मागणी केली जात असतानाच आता या प्रकरणाच्या चौकशीसाठी 1 जानेवारीला नेमण्यात आलेली एसआयटी रद्द करून चौकशीसाठी सात जणांची एसआयटी स्थापन केली असल्याची माहिती भाजप आमदार सुरेश धस यांनी दिली.

संतोष देशमुख हत्या प्रकरणात भाजप (BJP) आमदार सुरेश धस यांनी मोठी माहिती दिली आहे. आधीच्या एसआयटीवर देशमुख कुटुंबाचा आक्षेप होता. या घटनेतील आरोपी एसआयटीतील अधिकाऱ्यांच्या संपर्कातील होते, असाही आरोप देशमुख कुटुंबाकडून करण्यात आला होता. त्याचमुळे नव्या एसआयटीची स्थापना करण्यात आल्याची माहिती धस यांनी माध्यमांशी बोलताना दिली.

या प्रकरणी आता सात जणांच्या नव्या एसआयटीची स्थापना करण्यात आली आहे. या पूर्वीच्या एसआयटीमधील बरेच अधिकारी हे आरोपी वाल्मिक कराड यांच्या संपर्कातील होते. त्यामुळे या प्रकरणाची चौकशी करताना अडचण येण्याची शक्यता होती. त्यामुळे १ जानेवारीला स्थापन करण्यात आलेली एसआयटी रद्द करावी, अशी मागणी देशमुख कुटुंबीयांनी मुख्यमंत्री फडणवीस यांची भेट घेऊन केली होती. त्यानुसार आता नव्याने सात जणांची एसआयटी नेमली असल्याचे आमदार धस (Suresh Dhas) यांनी सांगितले.

या पूर्वी नेमण्यात आलेल्या एसआयटीमध्ये पोलीस उपमहानिरीक्षक बसवराज तेली यांच्या अध्यक्षतेखालील या विशेष तपास पथकात पोलीस उपअधीक्षक अनिल गुजर, सपोनि विजयसिंग जोनवाल, पीएसआय महेश विघ्ने आणि पीएसआय आनंद शंकर शिंदे, सहाय्यक पीएसआय तुळशीराम जगताप यांच्याशिवाय इतर पोलीस कर्मचारी यांचा समावेश करण्यात आला होता. ही एसआयटीची कमेटी आता रद्द करण्यात आली आहे.