Ambadas Danve Reaction On Babri: बाळासाहेबांचा बाबरीशी संबंध नाही सांगणारे, आम्ही पानीपतच्या लढाईत लढलो असेही सांगतील..

Shivsena News: हिंदुहृदयसम्राट शिवसेनाप्रमुख बाळासाहेब ठाकरे (Balasheb Thackeray) यांच्या निधनानंतर (२०१२) त्यांची प्रतिमा, कर्तृत्व लोकांच्या मनातून पुसण्याची एकही संधी भाजपने सोडलेली नाही. २०१४ साली शिवसेनेशी युती तोडणे हा त्याच खेळीचा भाग होता, असा दावा विधान परिषदेचे विरोधी पक्षनेते अंबादास दानवे यांनी केला आहे. भाजप नेते व उच्च व तंत्र शिक्षणमंत्री चंद्रकांत पाटील यांनी बाळासाहेब ठाकरे आणि बाबरी मस्जिदीबाबत मोठा खुलासा केला होता.

बाबरी पाडण्याच्या घटनेशी शिवसेनेचा (Shivsena) काहीही संबंध नाही. तिथं ना शिवसैनिक होते, ना बाळासाहेब ठाकरे होते. बाळासाहेबांनी केवळ जबाबदारी घेतली होती, पण एकही शिवसैनिक अयोध्येत नव्हता असं विधान त्यांनी केले होते. (Chandrakant Patil) त्यानंतर ठाकरे गटाकडून संतप्त प्रतिक्रिया उमटायला लागल्या आहेत.

पक्षप्रमुख उद्धव ठाकरे यांनी तर चंद्रकांत पाटील यांच्या राजीनाम्याचीच मागणी मुख्यमंत्री एकनाथ शिंदे यांच्याकडे केली आहे. ते जर राजीनामा देत नसतील तर तुम्ही मुख्यमंत्री पदाचा राजीनामा द्या, असेही ठाकरे म्हणाले. चंद्रकांत पाटील यांच्या विधानावर विधान परिषदेचे विरोधी पक्षनेते अंबादास दानवे यांनी देखील आपली भूमिका मांडली. ट्विटच्या माध्यमातून त्यांनी भाजपवर निशाणा साधला.

दानवे यांनी केलेल्या ट्वीटमध्ये म्हटले आहे की, हिंदुहृदयसम्राट शिवसेनाप्रमुख बाळासाहेब ठाकरे यांच्या निधनानंतर (२०१२) त्यांची प्रतिमा, कर्तृत्व लोकांच्या मनातून पुसण्याची एकही संधी भाजपने सोडलेली नाही. २०१४ साली शिवसेनेशी युती तोडणे हा त्याच खेळीचा भाग होता. चंद्रकांत पाटील यांचे आजचे वक्तव्य म्हणजे ही कृतघ्नता असून ती लोकांना खपणारी नाही. मुळात यांच्यासारखे माणसं सरकारात असताच कामा नये.

मिंधे गट यावर आता काय बोलणार, की आता सगळे बोटं चेपले आहेत ? सत्तेसाठी हिंदुत्व सोडलं आम्हाला म्हणता, तुम्ही तर चक्क बाळासाहेब सोडले! जनता हिशेब करेलच. १९९२ साली बालवाडीत शिकणारे आज सांगतात आम्ही कारसेवेत होतो. थोड्या दिवसाने भाजप हे पण सांगेल की आमचे संपूर्ण केंद्रीय आणि राज्यातील मंत्रिमंडळ पानिपतच्या लढाईत लढले होते. खोटेपणाची, अपमानित करण्याची हद्दच झाली, असा संताप दानवे यांनी व्यक्त केला.