Mumbai News : बारामती विमानतळाजवळील अपघातात राज्याचे उपमुख्यमंत्री अजित पवार यांचे बुधवारी सकाळी निधन झाले. त्यानंतर आता राज्यातील राजकीय घडामोडीना वेग आला आहे. शुक्रवारी दुपारी बाराच्या सुमारास राष्ट्रवादी काँग्रेसचे शिष्टमंडळ मुख्यमंत्री देवेंद्र फडणवीस यांच्या भेटीसाठी वर्षा या निवासस्थानी गेले होते. यानंतर प्रसारमाध्यमांशी बोलताना मंत्री छगन भुजबळ यांनी मोठी माहिती दिली आहे. विधिमंडळ पक्षनेता ठरविण्यासाठी शनिवारी बैठक होणार असून त्यात निर्णय झाल्यास शनिवारी नव्या उपमुख्यमंत्र्याचा शपथविधी होणार असल्याचे त्यांनी स्पष्ट केले.
राष्ट्रवादी काँग्रेसच्या (NCP) शिष्टमंडळाने देवेंद्र फडणवीस यांची भेट घेतली. या शिष्टमंडळात माजी केंद्रीय मंत्री प्रफुल्ल पटेल, खासदार सुनील तटकरे व मंत्री छगन भुजबळ यांचा समावेश होता. त्यांनी फडणवीस यांची भेट घेऊन सध्याच्या राजकीय परिस्थितीवर चर्चा केली. राष्ट्रवादी काँग्रेसच्या नेत्याची सुमारे सव्वातास बैठक झाली. या बैठकीनंतर राज्यातील घडामोडीना वेग आला आहे.
अजितदादा यांच्या निधनाने रिक्त असलेल्या जागेचा निर्णय लवकरात लवकर निर्णय घ्या, अशी मागणी यावेळी शिष्टमंडळाने केली आहे. फडणवीस यांच्या भेटीनंतर प्रसारमाध्यमांशी बोलताना छगन भुजबळ (Chhagan Bhujbal) म्हणाले, विधिमंडळ पक्षनेता ठरविण्याबाबत शनिवारी बैठक होणार आहे. त्या बैठकीत निवड केली जाणार आहे. त्याबाबत उद्याच्या बैठकीत निर्णय झाल्यास शनिवारी नव्या उपमुख्यमंत्र्याचा शपथविधी होणार असल्याचे त्यांनी स्पष्ट केले.
जनतेची आणि आम्हा सर्वांची इच्छा आहे की सुनेत्रा पवार यांची गटनेता आणि उपमुख्यमंत्रीपदी निवड व्हावी. याबाबत विधिमंडळ पक्षाच्या बैठकीत याबाबत अधिकृत निर्णय होईल. सध्या सुनेत्रा पवार यांच्यारुपाने उपमुख्यमंत्रीपद कसे भरता येईल, हे आमच्यासाठी महत्त्वाचे आहे. शनिवारी मुंबईत पक्षाच्या सर्व आमदारांची महत्त्वाची बैठक आयोजित करण्यात आली आहे, असेही भुजबळ यांनी सांगितले.
दरम्यान, मुख्यमंत्री देवेंद्र फडणवीस यांच्या भेटीबाबत बोलताना सुनील तटकरे म्हणाले की, 'मुख्यमंत्री फडणवीस यांची भेट जरूर झाली. सुनेत्रा वहिनी आणि त्यांचे कुटुंब धार्मिक विधीत आहे. त्यानंतर आम्ही कुटुंबाशी संपर्क करू. जनतेच्या मनातील मत, आमदारांच्या मनातील मत या सर्वांवर बोलू. सुनेत्रा वहिनींशी बोलणंही महत्त्वाचं आहे. दादाने ज्या पद्धतीने संबंध महाराष्ट्र घडवला. त्यांच्या निधनाने राज्य शोकमग्न आहे. त्याच शोकाकूल वातावरणात आम्ही आहोत. बाकीच्या विषयावर चर्चा झाली नाही.’
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.