Ajit Pawar Death : राष्ट्रवादी काँग्रेस ZP आणि पंचायत समितीचा प्रचार करणार नाही..., अजित पवारांच्या निधनानंतर पक्षाचा मोठा निर्णय

Pune News, 30 Jan : महाराष्ट्राचे उपमुख्यमंत्री आणि राष्ट्रवादी काँग्रेसचे अध्यक्ष अजित पवार यांचं बुधवारी (ता.२८) विमान अपघातात निधन झालं. त्यांच्या पार्थिवावर काल बारामतीमध्ये अंत्यसंस्कार करण्यात आले. अजित पवारांच्या निधनामुळे राष्ट्रवादी काँग्रेस पक्षातील नेत्यांमध्ये दु:खाचं वातावरण आहे.

शिवाय पक्ष पोरका झाल्याची भावना देखील अनेक नेत्यांनी बोलून दाखवली आहे. एकीकडे अजित पवारांचं निधन (Ajit Pawar Death) झालं तर अवघ्या काही दिवसांवर  जिल्हा परिषद आणि पंचायत समितीच्या निवडणुका आल्या आहेत. याच पार्श्वभूमीवर आता राष्ट्रवादी काँग्रेस पक्षाने जिल्हा परिषद आणि पंचायत समिती निवडणुकीचा प्रचार न करण्याचा निर्णय घेतल्याची माहिती समोर आली आहे.

मिळालेल्या माहितीनुसार, अजित पवारांच्या निधनानंतर पुण्यातील राष्ट्रवादी काँग्रेसने जिल्हा परिषद आणि पंचायत समिती निवडणुकीचा प्रचार थांबवण्याचा निर्णय घेतल्याची माहिती समोर आली आहे. राष्ट्रवादी या निवडणुकीत प्रचार आणि रोड शो करणार नाहीत. तर केवळ मतदारांना पत्रके वाटून प्रचार करणार आहे.

उमेदवारांनी घरोघरो जाऊन पत्रके वाटून निवडणूक लढवावी असा आदेश पक्षाकडून देण्यात आला आहे. शिवाय विजयी झाल्यांनतरही मिरवणूक काढली जाणार नाही, असं सांगितलं जात आहे. त्यामुळे आता राज्यात अजित पवारांच्या निधनानंतर तीन दिवसांचा शासकीय दुखवटा जाहीर केला असतानाच आता पक्षाने देखील या शोकाकूल वातावरणात प्रचार न करण्याचा निर्णय घेतल्याचं पाहायला मिळत आहे.

दरम्यान, अजित पवारांच्या पश्चात पक्षाची धुरा कोणाकडे जाणार? या चर्चांना देखील उधाण आलं आहे. तर राष्ट्रवादीच्या नेते आणि पदाधिकाऱ्यांकडून पक्षाचे नेतृत्व सुनेत्रा पवार यांच्याकडे सोपवून त्यांना उपमुख्यमंत्री करण्याची मागणी केली जात आहे. दरम्यान, या संबंधित राष्ट्रवादीच्या वतीने राज्याचे मुख्यमंत्री देवेंद्र फडणवीस (Devendra Fadnavis) यांना पत्र पाठवले जाणार असल्याचंही सांगितलं जात आहे.