Ncp News : सुनेत्रा पवारांसमोरच भुजबळ विरुद्ध तटकरेंमध्ये 'हायव्होल्टेज ड्रामा' : समीर भुजबळांच्या नाराजीनंतर राष्ट्रवादीत उभी फूट?

Mumbai News : राष्ट्रवादी काँग्रेस पक्षातीलअंतर्गत धुसफूस आता थेट जाहीर व्यासपीठावर आली आहे. प्रदेशाध्यक्ष सुनील तटकरे आणि ज्येष्ठ नेते छगन भुजबळ यांच्यातील शीतयुद्ध आता उघड वाक्युद्धात बदलले असून, उपमुख्यमंत्री सुनेत्रा पवार यांच्या उपस्थितीतच दोन्ही नेत्यांनी एकमेकांवर जोरदार निशाणा साधला.

समीर भुजबळ यांना मंत्रिमंडळात स्थान न मिळाल्यामुळे भुजबळ कुटुंब नाराज असल्याची चर्चा आहे. ही नाराजी व्यक्त करताना भुजबळ यांनी इतरांची मुलं आमदार, खासदार, मंत्री आहेत, मलाही त्याचप्रमाणे न्याय मिळावा, असं म्हणत तटकरे यांचं नाव न घेता निशाणा साधला होता. आता या दोन्ही नेत्यांमधील शाब्दिक चकमकीने राजकारण कमालीचे तापले आहे.

तटकरे यांनी भुजबळांच्या 'त्या' विधानाचा घेतला समाचार

काही दिवसांपूर्वी छगन भुजबळ (Chhagan Bhujbal) यांनी पक्षांतर्गत नाराजीवर बोलताना, "मी कबड्डीचा खेळाडू आहे, बुद्धिबळाचा नाही," असे सूचक विधान केले होते. याचाच जाहीर समाचार घेत सुनील तटकरे यांनी भुजबळांना टोला लगावला. तटकरे म्हणाले, "छगन भुजबळ हे नक्कीच कबड्डीचे खेळाडू आहेत, सोबतच ते अभिनेते आणि निर्मातेही आहेत.

भुजबळ यांनी कबड्डीत एक-एक करून अनेक खेळाडू बाद केले आहेत आणि कधीकधी ते एकाच वेळी सगळ्यांना बाद करतात. पण, शिवसेनेत (Shivsena) असताना त्यांनी दोनवेळा महापौरपद मिळवले, तेव्हा त्यांनी कोणाला चेकमेट केले होते?" असा थेट सवाल तटकरे यांनी केला. तसेच आपल्या पक्षात सर्व प्रकारचे खेळाडू असून हे सर्व खेळाडू अजितदादांनीच तयार केल्याचे त्यांनी सुनेत्रा पवारांसमोर स्पष्ट केले.

'राजकारणाचा खेळ करू नका'; छगन भुजबळांचा थेट पलटवार

सुनील तटकरे यांच्या या टीकेनंतर छगन भुजबळ यांनीही आक्रमक पवित्रा घेत व्यासपीठावरूनच सडेतोड उत्तर दिले. भुजबळ म्हणाले, "पक्षापेक्षा कोणीही मोठे नाही हे लक्षात ठेवले पाहिजे. मगापासून चालले आहे हा खो-खो खेळतो, तो कबड्डी खेळतो, हा बुद्धिबळ खेळतो. अरे बाबांनो, खेळात राजकारण आणू नका आणि राजकारणाचा खेळ करू नका! पक्ष म्हणजे फक्त झेंडा, ऑफिस किंवा वरील बोर्ड नाही, तर पक्ष म्हणजे कार्यकर्त्यांचा मोठा समूह आहे."

पदे म्हणजे अळवावरचे पाणी : भुजबळ

आपल्या भाषणात भुजबळांनी तटकरे यांचे नाव घेता बरेच काही सुनावले. "नेत्यांमध्ये मतभेद असू शकतात, पण मनभेद नसावेत. दुसरी गोष्ट म्हणजे, कोणतीही पदे असो, ती अळवावरच्या पाण्यासारखी असतात; कधी निसटून जाईल हे सांगता येत नाही. माणसाचा केवळ कार्यकर्ता जिवंत राहिला पाहिजे. संघर्ष हा आपला वारसा आहे," असे म्हणत त्यांनी ज्या निष्ठा अजितदादांच्या चरणी वाहिल्या, त्याच आता सुनेत्रा वहिनींच्या चरणी वाहणार असल्याचे स्पष्ट केले.