Pune Crime : पुण्यात 73 वर्षीय वृद्धाचे संतापजनक कृत्य! 'एक पप्पी... दे', म्हणत केला 27 वर्षीय तरुणीचा विनयभंग

Pune News : पुण्यात एक धक्कादायक प्रकरण समोर आले असून एका 73 वर्षीय वृद्धानेच तरुणीचा विनयभंग केल्याची घटना उघडकीस आली आहे. यामुळे पुन्हा एकदा पुण्यातील महिलांच्या सुरक्षेचा प्रश्न ऐरणीवर आला आहे. याप्रकरणी त्या वृद्धाविरोधात तक्रार दाखल करण्यात आली असून पोलिसांनी त्याला अटक केली आहे. या घटनेमुळे आता पुण्यात संतापाची लाट पाहायला मिळत आहे.

याबाबत विश्रामबाग रोड पोलिसांनी दिलेल्या माहितीनुसार पुणे शहरातील एका खासगी क्लिनिकमध्ये ही घटना घडली. येथे 3 जुलै 2025 रोजी सायंकाळी 7 वाजण्याच्या सुमारास 73 वर्षीय वृद्धाने 27 वर्षीय तरुणीचा विनयभंग केला. या वृद्धाने क्लिनिकच्या रिसेप्शनवर एकट्या असलेल्या तरुणीशी अश्लील वर्तन केले.

त्या वृद्धाने तिला 'मला एक पप्पी दे, तुला हवं ते देतो', असेही म्हणाल्याचा आरोप संबंधित तरुणीने केला आहे. या या प्रकरणी विश्रामबाग पोलिसांनी गुन्हा दाखल करून आरोपीला अटक केली आहे. पोलिसांनी अटक केलेल्या त्या वृद्धाचे नाव सुरेशचंद चोरडिया असे आहे.

नेमकं काय घडलं?

सुरेशचंद चोरडिया या वृद्धाने 3 जुलै 2025 रोजी सायंकाळी 7 वाजण्याच्या सुमारास त्या क्लिनिकमध्ये प्रवेश केला. त्यावेळी ती तरूणी तेथे एकटीच रिसेप्शनवर होती. यावेळी चोरडिया याने संधी साधत तिच्याशी अश्लील वर्तन सुरू केले. फक्त वर्तनच केले नाही. तर तिच्या गालाला हात लावत “पप्पी दे” माझ्याकडे पैसे आहेत. तुला जे हवे ते मी देतो. तुला हॉटेलमध्ये जेवायला नेतो, पण मला पप्पी दे, अशी मागणी केली.

या धक्कादायक आणि अनपेक्षित प्रकारानंतर घाबरलेल्या त्या तरुणीने तात्काळ क्लिनिकबाहेर पळ काढला, पण चोरडियाने पुन्हा पाठलाग करत तिचा विनयभंग करण्याचा प्रयत्न केला. यानंतर थेट विश्रामबाग पोलीस ठाणे गाठत त्या तरूणीने हा प्रकार पोलिसांना सांगितला आणि तक्रार दाखल केली.

तक्रारदार तरूणीच्या फिर्यादीवरून विश्रामबाग पोलिसांनी तात्काळ कारवाई करत चोरडियाला अटक केली आहे. सध्या प्रकरणाचा तपास सुरू असून यामुळे परिसरात खळबळ उडाली आहे. तर या धक्कादायक प्रकारामुळे पुण्यात संतापाची लाट उसळली आहे.