Ahilyanagar BJP News: भाजपने अहिल्यानगर महापालिका निवडणुकीसाठी जाहीर केलेल्या उमेदवारांच्या यादीवरून मोठा गोंधळ निर्माण झाला आहे. कोअर कमिटीसमोर उमेदवारांची यादी न येता त्यातील उमेदवारांची नावे परस्पर बदलत ही यादी जाहीर करण्यात आल्याचा आरोप होत आहे.
या संदर्भात भाजपचे राज्य निवडणूक प्रमुख चंद्रशेखर बावनकुळे आणि संघटन सरचिटणीस यांच्याकडे तक्रार करण्यात आली आहे. भाजपच्या उमेदवार यादीवरून सुरू झालेल्या आरोपामुळे अहिल्यानगरच्या भाजपमध्ये भूकंप झाला आहे.
भाजपने (BJP) अहिल्यानगर महापालिका निवडणुकीसाठी 32 जणांच्या उमेदवारांची यादी मंगळवारी जाहीर केली. ही यादी जाहीर करण्यापूर्वी एबी फॉर्म देखील उमेदवारांना देण्यात आले होते. हे एबी फॉर्म पक्षाचा सदस्य नसल्याच्या व्यक्तीकडून पोहोचविण्यात आल्याचा आरोप आहे. यातच यादीवर भाजपच्या कोअर कमिटीच्या सदस्यांची सही नसल्याने, त्यावरून आक्षेप घेतला जात आहे.
हा आक्षेप घेताना भाजपने महापालिकासाठी (Municipal Election) 2018 रोजी प्रसिद्ध केलेल्या उमेदवारांच्या यादीचा संदर्भ दिला गेला. या यादीवर कोअर कमिटीच्या सह्या आहेत. परंतु यंदाच्या यादीवर नाहीत, याकडे लक्ष वेधले आहे.
भाजपने महापालिका निवडणुकीसाठी पालकमंत्री राधाकृष्ण विखे पाटील यांच्या अध्यक्षतेखाली दहा जणांची कोअर कमिटी तयार केली होती. परंतु ही कोअर कमिटी मोठी होते. त्यामुळे बैठकांची गोपनीयता राहू शकत नाही. यामुळे माजी खासदार सुजय विखे पाटील, शहर जिल्हाधक्ष अनिल मोहिते, माजी शहराध्यक्ष अभय आगरकर, सुनील रामदासी, बाबासाहेब सानप, सुवेंद्र गांधी, यांची समिती तयार करण्यात आली. पण या समितीची एकच बैठक झाल्याचे सांगितले जाते.
या समिती समोर इच्छुक उमेदवारांच्या मुलाखती झाल्या. त्यावर चर्चा देखील झाली. मात्र प्रत्यक्ष उमेदवारी जाहीर करताना जी नावे कोअर कमिटी पुढे आली नाहीत, अशा अनेक नावांचा समावेश करून, ती यादी जाहीर करण्यात आली. ही नावे कोअर कमिटीतील सदस्यांसाठी धक्कादायक आहेत, अशा तक्रारी कमिटी मधील सदस्यांच्या आहेत.
कोअर कमिटीमधील सदस्य अभय आगरकर म्हणाले, "ज्यांची उमेदवारी निश्चित झाली होती, त्यांची यादीमध्ये नावे दिसत नाहीत. उमेदवारीमध्ये बदल करताना आम्हाला विचारण्यात आलेली नाही. तसे विश्वासात घ्यायला हवे होते. याबाबत आमची नाराजी आहे."
यावर कोअर कमिटीचे सदस्य तथा शहर जिल्हाध्यक्ष अनिल मोहिते यांनी प्रतिक्रिया दिली. "गेल्या निवडणुकीप्रमाणे यावेळीही उमेदवार जाहीर करणाऱ्या यादीवर कोअर कमिटी सदस्यांच्या सह्या आहेत. तशी सह्या असल्याची यादी मी दाखवू शकतो. परंतु माध्यमांना प्रसिद्ध देताना यादी कोअर कमिटीचे सदस्यांची सही नसलेली दिली आहे. ही यादी कोअर कमिटी पुढेच तयार करण्यात आलेली आहे. त्यात कोणताही बदल न करता जाहीर केलेली आहे, असा दावा अनिल मोहिते यांनी केला.
अहिल्यानगर महापालिका 2018च्या निवडणुकीत तत्कालीन पालकमंत्री प्रा. राम शिंदे. प्रदेश सरचिटणीस आमदार सुजितसिंह ठाकूर, शहर जिल्हाध्यक्ष दिलीप गांधी, भानुदास बेरड, अभय आगरकर, किशोर बोरा आणि सुनील रामदासी यांची सही होती. आता ही जुनी यादी समाज माध्यमांवर व्हायरल होत आहे. त्यामुळे भाजपने यंदाच्या निवडणुकीमध्ये जाहीर केलेल्या उमेदवारांच्या यादीबाबतीत वेगवेगळ्या चर्चा होऊ लागल्या आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.