Mohite Patil : पुणे पदवीधरची निवडणूक जाहीर होताच मोहिते पाटलांनी ‘शिवरत्न’वर बोलावली बैठक; धैर्यशील मोहिते पाटलांसोबत रणजितदादाही मैदानात...

Solapur, 22 September : राज्यातील पुणे, नागपूर, संभाजीनगर पदवीधर, तर अमरावती, पुणे या शिक्षक मतदारसंघांची निवडणूक जाहीर झाली आहे. या पाच जागांसाठी भारतीय जनता पक्षाकडून मागील काही महिन्यांपासून पूर्वतयारी करण्यात येत आहे. पुणे पदवीधर आणि शिक्षक मतदारसंघासाठी महायुतीमधील तीन पक्षांत जोरदार रस्सीखेच दिसून येत असताना आता महाविकास आघाडीतील राष्ट्रवादी काँग्रेस शरदचंद्र पवार पक्षाचे खासदार धैर्यशील मोहिते पाटील यांनी दंड थोपटले आहेत. येत्या गुरुवारी त्यासंदर्भात समर्थक आणि कार्यकर्त्यांची बैठक अकलूजच्या शिवरत्न बंगल्यावर आयोजित करण्यात आली आहे.

पुणे शिक्षक आणि पदवीधर मतदासंघात महायुतीमध्ये जोरदार रस्सीखेच दिसून येत आहे. मागील निवडणुकीत दोन्ही जागांवर भाजपचा पराभव झाला होता. त्यामुळे या दोन्ही जागा परत मिळविण्यासाठी भाजपने कंबर कसली आहे. विशेषतः पदवीधर मतदारसंघावर भाजपने विशेष लक्ष केंद्रीत केले आहे. कारण या मतदारसंघातून मंत्री चंद्रकांतदादा पाटील हे दोन वेळा निवडून आले आहेत. त्यामुळे ही जागा जिंकण्यासाठी भाजपने चंग बांधला आहे.

पुणे पदवीधर आणि शिक्षक मतदारसंघात सोलापूर, पुणे, सातारा, सांगली आणि कोल्हापूर जिल्ह्याचा समावेश होतो. सोलापूरमध्ये मोहिते पाटील आणि भाजप असा संघर्ष गेल्या काही निवडणुकीत दिसून आलेला आहे. खासदार धैर्यशील मोहिते पाटील यांनी भाजप विशेषतः पालकमंत्री जयकुमार गोरे यांच्यात जोरदार सामना झाला आहे. धैर्यशील यांच्या मदतीला आता माजी आमदार रणजितसिंह मोहिते पाटीलही येण्याची शक्यता आहे.

पुणे पदवीधर निवडणुकीच्या अनुषंगाने मोहिते पाटील यांनी येत्या गुरुवारी (ता. २४ सप्टेंबर) अकलूजच्या शिवरत्न बंगल्यावर बैठकीचे आयोजन करण्यात आले आहे. बैठकीसाठी प्रमुख कार्यकर्ते, सरपंच आणि युवा कार्यकर्त्यांना पाचारण करण्यात आले आहे. लोकसभा निवडणुकीनंतर प्रथमच ‘शिवरत्न’वर मोहिते पाटील समर्थकांची बैठक होणार आहे.

या बैठकीत खासदार धैर्यशील मोहिते पाटील यांच्यासोबत माजी आमदार रणजितसिंह मोहिते पाटील हेही मार्गदर्शन करणार आहेत. त्यामुळे गेल्या काही वर्षांपासून राजकीय घडामोडीपासून अलिप्त असलेले रणजितसिंह आता राजकारण सक्रीय झाल्याचे दिसून येत आहे. त्यांनी जिल्हा बॅंकेच्या निवडणुकीच्या पार्श्वभूमीवर जिल्ह्यात बैठकींचा धडाका लावला आहे.

रणजितसिंह मोहिते पाटील हे लोकसभा निवडणुकीपासून भाजप आणि महाविकास आघाडीच्या व्यासपीठापासून दूर होते. मात्र, भाजपमध्ये होणारी कोंडी पाहून त्यांनी माढा मतदारसंघासह सोलापूर जिल्ह्यातील नेतेमंडळींच्या गाठीभेटी घेण्यास सुरुवात केली आहे. त्यामुळे भाजपच्या विशेषतः पालकमंत्री जयकुमार गोरेंच्या विरोधात मोहिते पाटील असा सामना सोलापुरात दिसण्याची शक्यता आहे.