Jaidatta Kshirsagar News: निधी आमचा, नारळ भलतेच फोडतात; जयदत्त अण्णांनी पुतण्यांवर फेकल्या करवंट्या...

Beed : सत्तेत असो किंवा नसो मात्र केंद्रात आणि राज्य सरकारमध्ये आपले मित्रत्वाचे संबंध असल्याने बीड शहरासह मतदारसंघातील विकासकामांसाठी आम्ही विकास निधी खेचून आणतो. मात्र, फोटो काढून सोशल मीडियात टाकून नारळ फोडण्याची सध्या चढओढ सुरू असून, वाढपेच भाव खातात, अशी परिस्थिती सध्या बीडमध्ये असल्याची फटकेबाजी माजी मंत्री जयदत्त क्षीरसागर यांनी केली.

दुसरे पुतणे सोडून गेल्यानंतर जयदत्त क्षीरसागर यांनी आपले चिरंजीव रोहित क्षीरसागर यांना मैदानात आणले आहे. गणेशोत्सवात आरत्यांच्या निमित्ताने क्षीरसागर पिता-पुत्र विविध मंडळांना भेटी देत आहेत. या वेळी त्यांनी नागरिकांशी संवाद साधताना नावे न घेता दोन्ही पुतण्यांवर टोलेबाजी केली.

जयदत्त क्षीरसागर म्हणाले, "बीड शहरातील विविध विकासकामांचे आपण साक्षीदार आहोत. उर्वरित कामांसाठीही आपण निधी आणू. जरी मी सत्तेत असलो किंवा नसलो तरी केंद्र आणि राज्य सरकारमध्ये मित्रत्वाचे संबंध असल्याने त्या माध्यमातून आपण शहराच्या विकासासाठी निधी आणतो. आत्तापर्यंत गेल्या सहा वर्षांमध्ये साधारण 450 कोटी रुपये शहराच्या रस्त्यासाठी आणि पिण्याच्या पाण्याच्या योजनेकरिता मिळविल्याचा दावाही जयदत्त क्षीरसागर यांनी केला.

लहान मुले आणि महिलांसाठी दोनशे खाटांचे सुसज्ज आशा नवीन हॉस्पिटलचे बांधकाम पूर्ण झालं. येत्या दीड दोन महिन्यांत त्याचा प्रारंभ होईल. बीड हे जिल्ह्याचे ठिकाण असून, येथील बस स्थानक भव्य दिव्य असायला पाहिजे. मात्र, त्याची काय अवस्था झाली. हे आपण पाहत आहात. परंतु ज्यांच्या हाती सत्ता आहे, त्यांनी याकडे ढुंकूनही पाहिले नाही, हे दुर्दैव आहे. आपण निधी आणला. मात्र, वाढप्यांनी त्यांची पंगत असल्याप्रमाणे सुरू केल्याचे जयदत्त क्षीरसागर म्हणाले. विकासाचा वारसा पुढे चालवू. तुमची साथ तुमची ताकद तुमचा आशीर्वादाची कवचकुंडल आम्हाला मिळत राहिली तर विकास आणखी वेगाने करू. ताकदीने नगर परिषद, स्थानिक स्वराज्य संस्थेच्या निवडणुकीत मजबुतीने लढवू, असे ते म्हणाले.

Edited By : Mangesh Mahale