प्रभागातील विकासकामावरून कोल्हापूर महापालिकेतील भाजपचे नगरसेवक विजयसिंह खाडे यांना मोका कारवाई झालेल्या व्यक्तीने धमकी दिल्याचा प्रकार घडला आहे. डिजिटल फलकावरून आजी-माजी नगरसेवकांत जुंपली असताना थेट जावायाने धमकी दिल्याने खळबळ उडाली आहे.
देवकर पाणंद परिसरात खासदार निधीतून मंजूर झालेल्या हॉलबाबत आभाराच्या फलकावरून नगरसेवक विजयसिंह खाडे-पाटील आणि माजी नगरसेवक सुभाष रामुगडे यांच्यात वादावादी झाली. रामुगडे यांचा जावई आकाश कदम याने ही धमकी दिली असल्याचे समोर आले आहे.
'मी मोकातून सुटलो आहे, अजून एक गुन्हा अंगावर घ्यायला तयार आहे', असे धमकावत जीवे मारण्याची धमकी दिल्याची तक्रार विजयसिंह खाडे यांनी जुना राजवाडा पोलिस ठाण्यात दिली. आज दुपारी बारा वाजण्याच्या सुमारास आयटीआय परिसरातील खाडे-पाटील यांच्या संपर्क कार्यालयासमोर हा प्रकार घडला.
विजयसिंह खाडे यांनी माजी खासदार संजय मंडलिक यांचे आभार मानणारा फलक वसंत विश्वास पार्क येथे उभारला होता. या फलकावरच माजी नगरसेवक सुभाष रामुगडे यांच्या मुलाच्या नावाचा फलक लावला. याबाबत खाडे यांनी सुभाष रामुगडे यांना विचारणा केली. यानंतर रामुगडे यांचा फलक बाजूला काढून ठेवला होता. यातून खाडे आणि रामुगडे यांच्यात वाद झाला होता. आज दुपारी रामुगडे यांचे जावई आकाश अशोक कदम याने विजयसिंह खाडे यांना फोन केला.
तुम्हाला भेटायचे आहे, असे सांगत आयटीआय जवळील खाडे यांच्या कार्यालयात जाऊन तुम्ही माझे सासरे सुभाष रामुगडे यांना शिवीगाळ का केली?, अशी विचारणा केली. त्यांच्यासाठी आणखी एक गुन्हा घेण्यास तयार असल्याचे सांगत जीवे मारण्याची धमकी दिल्याचे खाडे यांनी तक्रारीत म्हटले. याप्रकरणी आकाश कदम यांच्यावर अदखलपात्र गुन्हा दाखल केला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.