Rahul Patil: राहुल पाटलांचे ठरलं! अजितदादाचं 'घड्याळ' बांधणार; भोगावतीच्या बैठकीत शिक्कामोर्तब

Kolhapur News: गेल्या काही दिवसांपासून काँग्रेसचा निष्ठावंत गट आमदार सतेज पाटील यांची साथ सोडून राष्ट्रवादी सोबत जाणार असल्याची चर्चा सध्या जिल्ह्यात सुरू होती. जिल्हा परिषद माजी सदस्य आणि दिवंगत आमदार पी. एन. पाटील यांचे पुत्र राहुल पाटील यांचा निर्णय जवळपास झाला आहे.

याबाबत भोगावती सहकारी साखर कारखान्यावर प्रमुख कार्यकर्त्यांची बैठक घेत, या पक्षप्रवेशावर सहमती मिळवली आहे. लवकरच उपमुख्यमंत्री अजित पवार यांच्या उपस्थितीत राहुल पाटील यांचा पक्षप्रवेश होणार आहे. राष्ट्रवादी पक्षप्रवेशाबद्दल भोगावती साखर कारखान्यावर झालेल्या मेळाव्यात याला राधानगरी व करवीर, गगनबावडा तालुक्यातील कार्यकर्ते उपस्थित होते.

राहुल पाटील जो काही निर्णय घेतील त्यासोबत आपण राहणार असल्याचा सूर या प्रमुख कार्यकर्त्यांच्या बैठकीत उमटला. तर काही अनुपस्थितांनी काँग्रेस पक्षाशी एकनिष्ठ राहू, अशी भूमिका घेतल्याचे समजते . मी भोगावती साखर कारखाना आणि कार्यकर्त्यांच्या हितासाठी जो निर्णय घेईन, त्याला सहकार्य करा,’ असे आवाहन माजी जिल्हा परिषद सदस्य राहुल पाटील यांनी यावेळी केले.

या आवाहनाला अनेकांनी प्रतिसाद देऊन पाठीशी राहण्याचा निर्णय दिला, मात्र राधानगरी तालुक्यातील अनेक काँग्रेस नेते आणि प्रमुख कार्यकर्त्यांनी ह्या मेळाव्याकडे पाठ फिरवल्याचे स्पष्ट झाले.

अनेकांचा पाठिंबा

भोगावती साखर कारखान्याच्या सभागृहात हा मेळावा झाला. यावेळी अध्यक्ष शिवाजीराव पाटील यांच्यासह ‘गोकुळ’चे माजी संचालक पी. डी. धुंदरे, भोगावतीचे संचालक धीरज डोंगळे, ए .डी. चौगले आदी प्रमुख उपस्थित होते. साखर कारखाना वाचवण्यासाठी आणि कार्यकर्त्यांना बळ देण्यासाठी राहुल पाटील जो निर्णय घेतील, त्याच्या पाठीशी राहूया, असेही यावेळी चर्चेत ठरले.

या मेळाव्याला राधानगरी तालुका काँग्रेसचे अध्यक्ष हिंदुराव चौगले, विधानसभा समन्वयक सुशील पाटील (कौलवकर) यांनी आपल्याला पक्ष बदलता येणार नाही. आम्ही पक्षासोबत राहू, असा निरोप देऊन मेळाव्याकडे पाठ फिरवली. याशिवाय माजी जिल्हा परिषद सदस्य पांडुरंग भांदिगरे, संजय पाटील यांचीही अनुपस्थिती चर्चेची ठरली.