Kolhapur Politics : 'महाडिकांचं पाप' अन् 'पाटलांचं पोटशूळ' ; मंजूर कामाच्या स्थगितीवरून आरोप प्रत्यारोपांच्या फैरी..

Kolhapur News : राज्यात सत्तांतर झाल्यानंतर कोल्हापुरातील सर्व कामांना स्थगिती मिळाली. मंजूर कामांना स्थगिती मिळाल्यानंतर महाविकास आघाडीकडून शिंदे- फडणवीस सरकारला धारेवर धरले. कोल्हापूर जिल्ह्यात यावरून आजही आरोप-प्रत्यारोप होत आहे. तत्कालीन पालकमंत्री सतेज पाटील यांनी 10 कोटी रुपयांचे इनडोअर स्टेडियम मंजूर केले होते. त्या कामाला आता स्थगिती मिळाल्याने त्यांनी थेट राज्यसभा खासदार धनंजय महाडिक यांच्यावर तोफ डागली आहे. (Latest Marathi News)

कोल्हापूर जिल्ह्यात प्रथमच दहा कोटी रुपयांचे इनडोअर स्टेडियम मंजूर झाले होते. त्याची वर्क ऑर्डर दुसऱ्या दिवशी निघणार होती. मात्र खासदार धनंजय महाडिक यांनी हे काम रद्द केले. त्यांनी हे काम का रद्द केले? 'याचा खुलासा त्यांनी करणे अपेक्षित होते. हे काम रद्द करणे हे पाप आहे. त्यांनी खेळाडूंच्यावर अन्याय केला आहे,' असा आरोप आमदार सतेज पाटील यांनी खासदार धनंजय महाडिक यांचे नाव घेताच केला.

आमदार सतेज पाटील यांच्या आरोपांना खासदार धनंजय महाडिक यांनी प्रत्युत्तर दिले आहे. 'साप साप म्हणून भुई थोपटण्यात सतेज पाटील वाकबगार आहेत. पण आता इनडोअर स्टेडियमच्या कामातून ढपला पाडता आला नाही, हे त्यांचे खरे दुःख आणि मळमळ आहे. त्याचेच पोटशूळ त्यांना उठले आहे,' अशी टीका महाडिक यांनी केली आहे.

राज्यात कोणतेही सरकार असले तरी जिल्ह्यातील राजकारण पाटील-महाडिक गटाभोवती फिरते. पाटील-महाडिक हे दोघेही आपापल्या परीने कोल्हापूर जिल्ह्यातील विकासकामांना मार्गी लावले. दोघांनी यापूर्वीही एकमेकांवर कठोर टीका केली आहे. मात्र यावेळी पहिल्यांदाच आमदार सतेज पाटील यांनी खासदार धनंजय महाडिक यांचं नाव घेऊन थेट आरोप केला आहे.

खरंतर कोल्हापूर शहर व जिल्ह्याची क्रिडानगरी म्हणून ओळख आहे. खेळाडूंनी कष्टाने हे नाव मिळवून दिले आहे. मात्र खेळाडूंसाठी होत असलेल्या इनडोअर स्टेडियम रद्द व्हावा, हा निर्णय खेळाडूंच्या दृष्टीने त्यांना दोन पावले मागे नेणारा आहे. एकमेकांवर राजकीय चिखलफेक करण्यात ऊर्जा खर्च करण्यापेक्षा, त्या कामाला मंजुरी देत खेळाडूंना बळ देण्याची गरज आहे, असे सतेज पाटील म्हणाले.