Prakash Javadekar : "सलग पराभवामुळेच..."; भाजप खासदारांना धक्काबुक्की अन् 'ईव्हीएम'च्या मुद्द्यावरून जावडेकरांनी राहुल गांधींना धुतलं

Kolhapur News, 20 Dec : गेले पंधरा वर्षे जनतेने काँग्रेसला नाकारल्यामुळे काँग्रेस नेते राहुल गांधी आणि कार्यकर्ते वैफल्यग्रस्त झाले आहेत. या रागापोटीच त्यांनी भाजप खासदारांना धक्काबुक्की केली. त्यावर स्वतःची चूक मान्य न करता धक्काबुक्कीने काहीही होत नाही, असं स्पष्टीकरण राहुल गांधींनी दिलं आहे.

मात्र, त्यांची ही दादागिरी खपवून घेतली जाणार नाही, असा इशारा माजी केंद्रीय मंत्री प्रकाश जावडेकर यांनी कोल्हापुरात दिला आहे. देशातील सुज्ञ जनतेने काँग्रेसला सलग पंधरा वर्षे सत्तेबाहेर बसवलं आहे. या लोकसभा निवडणुकीत भाजप सत्तेवर येऊ नये यासाठी त्यांनी अनेक प्रयत्न केले.

मात्र, जनतेने पुन्हा एकदा पंतप्रधान नरेंद्र मोदी (Narendra Modi) यांच्या सरकारला कौल दिला. पंधरा वर्षे सत्तेबाहेर बसल्याने काँग्रेस आणि त्यांचे घटक पक्ष वैफल्यग्रस्त झाले आहेत. या रागातूनच त्यांनी संसद परिसरात खासदार सारंगी यांना धक्काबुक्की केली. असं सांगत माजी मंत्री प्रकाश जावडेकर यांनी काँग्रेस नेते राहुल गांधी यांच्यावर कारवाई करण्याची मागणी केली.

तर, ईव्हीएमवर बोलताना ते म्हणाले, देशातील जनता ही सुज्ञ आहे. पाच वर्षाच्या राजकारणात मी प्रत्येक निवडणुकीत अनुभव घेतलेला आहे. ज्या ईव्हीएमवर ते लोकसभा निवडणूक जिंकले. त्याच ईव्हीएम बद्दल विधानसभेत पराभव झाल्यानंतर वाईट बोलत आहेत.

कर्नाटकात ज्या ईव्हीएमवर विजयी झाले ते ईव्हीएम चांगले. आणि महाराष्ट्रात पराभव झाला ते ईव्हीएम वाईट, काँग्रेसचा (Congress) ईव्हीएमवरील आरोप म्हणजे हास्यास्पद असल्याचंही जावडेकर म्हणाले. 1999 ला महाराष्ट्रात ही लोकसभा आणि विधानसभा निवडणूक एकत्र झाली होती. ओडीसा आणि आंध्र प्रदेशमध्ये आजही लोकसभा आणि विधानसभा निवडणूक एकत्र होतात. त्यामुळे एक देश एक निवडणुकीला विरोध करणे योग्य नसल्याचंही त्यांनी यावेळी स्पष्ट केलं.