Kolhapur News : कोल्हापूर जिल्हा दूध उत्पादक संघाच्या अध्यक्ष निवडीवरून झालेल्या राजकारणानंतर सत्ताधाऱ्यातील वरिष्ठ नेते चांगलेच सावध झाले आहेत. पुढील वर्षी होणाऱ्या गोकुळ दूध संघाच्या निवडणुकीच्या उकळीला आत्तापासूनच उधाण येताना दिसत आहेत. संघातील गब्बर असलेल्या संचालकांना आतापासूनच वरिष्ठ नेत्यांकडून शह देण्याचा प्रयत्न सुरू आहे. सत्तारूढ गटाच्या एका नेत्यांकडून ठराव प्रक्रिया सुरू होण्यापूर्वीच ‘टोकन’च्या माध्यमातून ‘फिल्डिंग’ लावली जात आहे. विशेष म्हणजे कालपासूनच याची सुरुवात राधानगरी, भुदरगड तालुक्यांतून झाली आहे.
गोकुळ दूध संघावर महायुतीचा अध्यक्ष करा, असा आग्रह धरत अध्यक्ष अरुण डोंगळे यांनी राजीनामा देण्यास नकार दिला. नंतर त्यांची तलवार म्यान झाली. नंतरच्या घडामोडीत वैद्यकीय शिक्षण मंत्री हसन मुश्रीफ यांचे चिरंजीव नवीद मुश्रीफ यांना अध्यक्ष करत मंत्री हसन मुश्रीफ व काँग्रेसचे आमदार सतेज पाटील यांच्यातील ‘दोस्ताना’ कायम ठेवला. एकीकडे यांची दोस्ती तुटली नाही, तर दुसरीकडे महायुतीचा अध्यक्ष झाला.
त्यानंतर समविचारी लोकांना सोबत घेऊन ‘गोकुळ’ लढवण्याचा माजी आमदार महादेवराव महाडिक यांनी दिलेला इशारा सत्ताधाऱ्यांना चांगलाच अडचणीचा ठरला आहे. त्यातच राज्यात आणि केंद्रात असलेली महायुतीची सत्ता, महाडिक यांची मुख्यमंत्री देवेंद्र फडणवीस यांच्याशी असलेली जवळीक, अशा गोष्टी पुढच्या निवडणुकीत सत्तारूढ गटासोबतच आमदार सतेज पाटील यांची वाट बिकट करणाऱ्या ठरू शकतात. त्यामुळे आता पासूनच सत्तेतील एका नेत्याने थेट टोकन पर्याय स्वीकारला आहे.
लोकसभा, विधानसभा निवडणुकीतील ‘हिशेब’ चुकते करण्याची संधी गोकुळच्या निवडणुकीत येणार आहे. भेटीगाठीच्या माध्यमातून ‘टोकन’सह संपर्काला राधानगरीतूनच सुरुवात करण्यामागे मावळते अध्यक्ष डोंगळे यांना शह देण्याची रणनीती आहे. डोंगळे यांनी अध्यक्षपदाचा राजीनामा देण्यास नकार देऊन नेत्यांनाच सुरुवातीला अंगावर घेतले. ‘सर्वाधिक ठरावदार संचालक’ अशी त्यांची ओळख आहे. त्यामुळे त्यांच्याच तालुक्यातून या मोर्चेबांधणीला सुरुवात झाली आहे.
जिल्हा बँकेच्या एका संचालकांनीही ‘गोकुळ’च्या निवडणुकीची स्वतंत्र तयारी केल्याचे बोलले जाते. या संचालकांकडूनही भुदरगड तालुक्यातील काही संस्थांच्या प्रमुखांपर्यंत ‘टोकन’ पोहोचवल्याची चर्चा आहे. यात हे संचालक स्वतः सहभागी आहेत की त्यांना पुढे करून कोण नेता हे करत आहे, याविषयीही उत्सुकता जिल्ह्यास लागली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.