Gokul election: 'गोकुळ’च्या एका मतासाठी लाखोंची तयारी, सहलींचं नियोजन : नवरात्रीमुळे ठरावधाकांचा नकार, नेत्यांची डोकेदुखी वाढली

Gokul election News: गोकुळ दुध संघाच्या निवडणूकीची तारीख जवळ येत असून या पार्श्वभूमीवर ठरावधारकांची मनमर्जी ठेवण्यासाठी दोन्ही गटांकडून जोरात प्रयत्न सुरु आहेत. गोकुळ'च्या निवडणुकीत ठरावदारांचे महत्त्व कमालीचे आहे. प्रत्येक मतासाठी राजकीय नेत्यांची प्रतिष्ठा पणाला लागली आहे. सहलीतून ठरावदारांना एकत्र ठेवण्याची रणनीती आखली जात आहे.

या निवडणूकीत प्रत्येक ठराव धारकाला आपल्या सोबत ठेवण्यासाठी जवळपास दीड लाखापासून ते तीन लाख रुपयांपर्यंतचा खर्च आतापासूनच केला जात आहे. ठराव धारकांना सहलीच्या माध्यमातून ऐशो आरामात प्रवासाचा आनंद देऊन मत पदरात पाडून घेण्याची रणनीती आखली जात आहे. मात्र दसरा आणि नवरात्रीच्या मुहुर्ताने या नियोजनाची कोंडी केली आहे.

'गोकुळ' निवडणुकीचा प्रचार धुमधडाक्यात सुरू आहे. महायुती आणि समविचारी, अशा दोन्ही पॅनेलकडून आपापला अजेंडा ठरावदारांपर्यंत पोहोचविण्यासाठी प्रयत्न सुरू आहेत. दूध उत्पादकांचे प्रश्न, दूध संकलन, दूध दर आणि संघाच्या कारभारावरून राजकीय वातावरण तापलेले असतानाच ठरावदारांना आपल्याच गोटात ठेवण्यासाठी धडपड वाढली आहे.

गोकुळ दुध संघाच्या २५ संचालकपदांसाठी महायुती आणि समविचारी या दोन गटांमध्ये मुख्य लढत आहे. १८ ऑक्टोबरला यासाठी मतदान होणार असून १९ तारखेला मतमोजणी होणार आहे. मतदानाची हमी मिळविण्यासाठी ठरावदारांना सहलीवर पाठविण्याचे नियोजन केले जात आहे. यासाठी संबंधित नेते आणि पदाधिकाऱ्यांवर ठरावदारांची मनधरणी करण्याची जबाबदारी दिली आहे.

महापालिका नगरसेवक, जिल्हा परिषद आणि पंचायत समित्यांचे सदस्य, पदाधिकारी, जिल्हा बँकेचे संचालक तसेच गावागावांतील कार्यकर्त्यांच्या माध्यमातून ठरावदारांशी संपर्क साधला जात आहे. मात्र, सणात घरदार सोडून सहलीला जाण्याबाबत ठरावदारांत फारसा उत्साह दिसत नसल्याचे चित्र आहे. ठरावदारांचा सहलीला नकार म्हणजे संबंधित पॅनेलला नकार की केवळ सणासाठी गावात थांबण्याचा निर्णय, हे मतदानाच्या दिवशीच स्पष्ट होईल. तूर्तास, 'मतदान तुम्हालाच; पण नवरात्र आमच्या गावातच', या भूमिकेमुळे निवडणुकीत सहलींच्या राजकारणापेक्षा ठरावदारांच्या विश्वासाची परीक्षा महत्त्वाची ठरणार आहे.