Padalkar On Sharad Pawar : पडळकर पुन्हा पवारांवर घसरले; एकेरी उल्लेख करत या वर्षी चौंडीत न येण्याचे कारण विचारले

Solapur News : भारतीय जनता पक्षाचे आमदार गोपीचंद पडळकर यांनी पुन्हा एकदा ज्येष्ठ नेते शरद पवार यांच्यावर एकेरी भाषेत टीका केली. गेल्या वर्षी पुण्यश्लोक अहिल्यादेवी होळकर यांच्या जयंती दिवशी पवारांनी मस्ती केली. या वर्षी पवार का नाही आला, असा उल्लेख पडळकर यांनी आपल्या भाषणात केला आहे. (Gopichand Padalkar criticizes Sharad Pawar)

सोलापूर जिल्ह्याच्या दक्षिण सोलापूर तालुक्यातील मंद्रूप येथे धनगर समाजाच्या बैठकीचे आयोजन करण्यात आले होते. त्या बैठकीत आमदार गोपीचंद पडळकर (Gopichand Padalkar) बोलत होते. आमदार रोहित पवार (Rohit Pawar) यांच्यावरही त्यांनी या वेळी सडकून टीका केली.

ते म्हणाले की, गेल्या वर्षी पुण्यश्लोक अहिल्यादेवी होळकर यांच्या जयंतीदिवशी पवारांनी मस्ती केली. या वर्षी पवार का नाही आला. पवार चार वेळा मुख्यमंत्री होता. बारा वर्षे केंद्रात मंत्री होता. आता आतापर्यंत होता. मागं कधी होता, मला माहिती नाही. गेल्या वर्षी त्यांना आपली चौंडी काढून घ्यायची होती, त्यामुळे तुमच्या परिवर्तनाचे केंद्र असणारे चौंडी जागृत ठेवली पाहिजे, असं आवाहनही पडळकर यांनी शरद पवार (Sharad Pawar) यांच्यावर टीका करताना केले.

जेजुरी देवस्थानमध्ये अहिल्यादेवी होळकर यांचा पुतळा बसविण्यात आला. जेजुरी संस्थान आणि पवारांचा काही संबंध नाही. जेजुरी संस्थान हे होळकरांची जहागिरी आहे. जेजुरी संस्थान येथील अहिल्याबाई होळकर यांच्या पुतळ्याचे उद्‌घाटन शरद पवार यांच्या हस्ते होणार, अशी पत्रिका आली. त्याच वेळी मला कळले होते की, काहीतरी मोठी गेम चालू आहे. मात्र पहाटे तरुणांना सांगून पुतळ्याचे मीच उद्‌घाटन केले. सांगलीतही तेच केले.

आमदार गोपीचंद पडळकर यांनी आमदार रोहित पवार यांच्यावर टीका केली. रोहित पवार हे जयंतीच्या दिवशी प्रसाद वाटत होते. रोहित पवार यांचा उल्लेख ‘माकडा’ असा करत धनगरांच्या घरी वर्षाला पाच बोकड कापतात, तुला माहिती नाही का, तुम्ही आता आयुष्यभर प्रसाद वाटायच्या कामाला आहात, असा टोमणाही त्यांनी पवार यांना लगावला.