Solapur Crime : जुन्या वादाचा सूड! शरद पवारांच्या समर्थकाकडून गोपीचंद पडळकरांच्या कार्यकर्त्याचं अपहरण

Solapur News, 08 Aug : भाजप आमदार गोपीचंद पडळकर यांच्या कार्यकर्त्याचे अपहरण केल्याची धक्कादायक घटना उघडकीस आली आहे. मारहाण आणि अपमानाचा बदला घेण्यासाठी मित्राच्या मदतीने अपहरणाचा कट रचल्याची प्राथमिक माहिती समोर आली आहे.

तर पोलिसांच्या सतर्कतेमुळे पडळकरांच्या कार्यकर्त्याच जीव थोडक्यात बचावला आहे. शरणु हांडे असं अपहरण झालेल्या कार्यकर्त्याचे नाव आहे. तर अमित सुरवसे असं अपहरण करणाऱ्या आरोपीचे नाव आहे.

सुरवसे हा शरद पवारांच्या राष्ट्रवादीचा समर्थक असल्याचं सांगण्यात येत आहे. संशयित आरोपीने याआधी आमदार पडळकरांच्या गाडीवर हल्ला केल्याची माहिती आता समोर आली आहे. सोलापूर पोलिसांना पडळकरांचा समर्थक शरणू हांडे यांच्या अपहरणची माहिती मिळाल्यानंतर त्यांनी तत्काळ 4 पथक शोधासाठी रवाना केली.

त्यानंतर गुरूवारी रात्री दहाच्या सुमारास अमित सुरवसेसह त्याच्या साथीदारांना पोलिसांनी ताब्यात घेतलं. पोलिसांनी सुरवसे याला ताब्यात घेतलं त्यावेळ शरणु हांडे हा गंभीर अवस्थेत असल्यामुळे त्याला सोलापुरात आणलं.

जुन्या वादातून अपहरण

या अपहरणामागे जुना वाद असल्याचं आता समोर आलं आहे. आरोपी अमित सुरवसेने 2021 साली गोपीचंद पडळकरांच्या गाडीवर दगडफेक केली होती. याचा राग मनात धरत शरणु हांडेने सुरवसेला बेदम मारहाण केल्याचं सांगितलं जात आहे. शिवाय या मारहाणीचा व्हिडीओ देखील व्हायरल झाला होता.

हा वाद हांडे आणि सुरवसे यांनी आपापसात मिटवला होता. मात्र, मारहाणीचा आणि अपमानाचा राग मनात धरत बदला घण्याच्या उद्देशाने अमित सुरवसे पुण्यातून भाड्याने कार घेतली. त्यानंतर तो मित्रांसोबत सोलापुरात आला आणि शरणु हांडेचं अपहरण केलं.

या प्रकरणी अमित सुरवसेसह इतर 6 जणांवर हत्येच्या उद्देशाने अपहरण केल्याप्रकरणी सोलापुरातील एमआयडीसी पोलीस स्टेशनमध्ये गुन्हा नोंद करण्यात आला आहे. दरम्यान, आमदार गोपीचंद पडळकर पोलिसांची आणि जखमी कार्यकर्त्याची भेट घेण्यासाठी आज सोलापुरातं येणार असल्याची माहिती आहे.