Prithviraj Chavan : पृथ्वीराजबाबांवर मी एकतर्फी प्रेम केलं : भाजप मंत्र्यांची जाहीर कबुली

Karad, 13 October : माजी मुख्यमंत्री पृथ्वीराज चव्हाण यांचे आणि माझे ऋणानुबंध चांगले आहेत. त्यात कोणताही बदल होणार नाही. मात्र, त्यांच्यावर मीच प्रेम केले. ते एकतर्फी होते, असे मी कित्येकदा स्पष्ट केले आहे, अशी कबुली राज्याचे ग्रामविकास मंत्री जयकुमार गोरे यांनी दिली.

पुणे पदवीधर मतदारसंघाच्या भाजप उमेदवारांच्या प्रचारासाठी कऱ्हाड येथे सभा झाली. त्या सभेनंतर माध्यमांशी बोलताना त्यांनी आपल्या जुन्या पक्षातील आठवणींना उजाळा देण्याचा प्रयत्न केला.

भारतीय जनता पक्षात प्रवेश करण्यापूर्वी जयकुमार गोरे हे काँग्रेस पक्षात होते. काँग्रेसमध्ये असताना तत्कालीन मुख्यमंत्री पृथ्वीराज चव्हाण यांचा गोरे यांना आशीर्वाद होता. चव्हाण यांचे कट्टर समर्थक अशीच गोरे आणि माढ्याचे माजी खासदार रणजितसिंह नाईक निंबाळकर यांची ओळख होती. मात्र, १ सप्टेंबर २०१९ मध्ये त्यांनी भाजपमध्ये प्रवेश केला.

गोरे सध्या देवेंद्र फडणवीस यांच्या सरकारमध्ये कॅबिनेट मंत्री आहेत. कराडमध्ये भाजप उमेदवाराच्या प्रचारार्थ आयोजित सभेनंतर माध्यमांशी बोलताना त्यांनी माजी मुख्यमंत्री चव्हाण यांच्याशी असलेल्या संबंधाबाबत भाष्य केले.

ते म्हणाले, पृथ्वीराज चव्हाण यांच्यासोबत माझे आजही चांगले संबंध आहेत. ते कायम राहतील. पण माझे पृथ्वीराजबाबांवर एकतर्फी प्रेम होते. मीच त्यांच्या प्रेम केले. त्यांच्या जवळ जे होते. त्यांना पृथ्वीराज चव्हाण यांना बऱ्याच गोष्टी दिल्या. पण ते लोक त्यांना सोडून गेले. तरीही आम्ही त्यांच्यासोबत राहिलो होतो. मात्र, तरीही त्यांनी निधी देताना दाखवलेला आखडता हात अधिकच दुःखदायक होता.

पृथ्वीराज चव्हाण यांच्या विरोधात मी कधीही बोललो नाही. मात्र, यावेळी बोलावे लागले. बदल सगळ्यांना समोर दिसतो आहे. तुम्ही काहीही केले तरी चालेल, हे आता चालणार नाही, असा टोलाही जयकुमार गोरे यांनी लगावला.