Jayant Patil : जयंत पाटलांना विरोधकांनी घेरलं, पण त्यांचे तोडीस तोड डाव ताकदवान महायुतीला धूळ चारणार?

Ishwarpur Politics : राष्ट्रवादी काँग्रेस शरदचंद्र पवार पक्षाचे ज्येष्ठ नेते जयंत पाटील यांच्यासाठी ईश्वरपूरची निवडणूक प्रतिष्ठेची आहे. त्यांना घेरण्यासाठी त्यांचे सर्व विरोधक एकत्र आले असून, भाजपकडूनही ताकद पणाला लावण्यात आली आहे.

उरुण-ईश्वरपूर नामांतरानंतरच्या पहिल्या निवडणुकीत जयंत पाटील यांच्या राष्ट्रवादी शरदचंद्र पवार पक्षाविरोधात महायुतीचे सर्व घटक पक्ष एकजुटीने रिंगणात उतरले आहेत. चार दशकांच्या राजकारणापैकी गेल्या दोन निवडणुकांमध्येच जयंतरावांना विरोधकांकडून प्रबळ आव्हान दिले जात आहे. यावेळीही ते आव्हान तितकेच ताकदीचे आहे. फरक इतका आहे की या आव्हानाची पुरती जाणीव जयंतरावांना आहे आणि त्यासाठी ज्या काही ‘औषध’योजना करायला हव्यात, त्याची सुरुवात त्यांना गेली चार-पाच वर्षे केली आहे. राज्यस्तरावरील जबाबदाऱ्यांमधून प्रथमच बाजूला असल्याने यावेळी त्यांनी शहरासाठी सलग 18 ते 20 तास तळ ठोकत ही लढत तोडीस तोड वळणावर आणली आहे.

विरोधक एकवटले

राज्यभरातील विरोधकांना माणसे टिकवणे हेच पहिले आव्हान आहे. गेल्या वेळी निशिकांत पाटील यांनी जयंतरावांच्या गोटातून भाजपमध्ये उडी मारत थेट नगराध्यक्षपदाची निवडणूक जिंकली. त्यानंतर ही गळती कायम आहे. माजी मंत्री अण्णासाहेब डांगे यांनी कुटुंबासह भाजप प्रवेश करीत मुलगा विश्वनाथ यांना नगराध्यक्षपदाची उमेदवारी मिळवली आहे. माजी उपनगराध्यक्ष जयवंत पाटील व संजय कोरे हे दोन मोहरेही विरोधी गटात गेले आहेत.

जयंतराव राज्यात व्यस्त असतील, तेव्हा इथली बहुतांशी सूत्रे डांगेचे चिरंजीव अॅड. चिमण हाताळत होते. याशिवाय भाजपचे जिल्हाध्यक्ष सम्राट महाडिक, शिवसेनेचे जिल्हाध्यक्ष आनंदराव पवार, विधानसभेवेळी राष्ट्रवादी अजित पवार गटाचे जिल्हाध्यक्ष झालेले निशिकांत पाटील, राहुल महाडिक, आमदार सदाभाऊ खोत अशी सारी मंडळी जयंतरावांना घेरण्यासाठी उठाबशा करीत आहेत. गतवेळपेक्षा फरक इतकाच की यावेळी माजी खासदार राजू शेट्टी मात्र अद्याप तटस्थ आहेत.

जयंत पाटीलही सक्रिय

एकूणच या आव्हानाची कल्पना आल्यानेच मी पूर्ण वेळ निवडणुकीत आहे, असं सांगत जयंतरावांनी उमेदवारांच्या मुलाखतीपासून अंतिम यादीत लक्ष घातले आहे. आधीच काठावरच्या मंडळींना सोडून जायचा सल्लाही दिला आहे. स्वपक्षातील बंडोबांना थंड केले. मी अजून राजकीय पटावर पाय रोवून भक्कमपणे उभा आहे, असा संदेशच त्यांनी सातत्याने दिला आहे. प्रभाग क्रमांक सातमध्ये आनंदराव पवार यांच्या विरोधात जिल्हाध्यक्ष दिलीप पाटील यांचे चिरंजीव संग्राम पाटील यांची उमेदवारी देऊन ‘मनगटाला मनगट’ हा संदेश त्यांनी दिला आहे. राज्यात व केंद्रात सत्ता नसताना जयंतराव दुसऱ्यांदा नगरपरिषद निवडणुकीला सामोरे जात असून, त्यांच्यासाठी ही निवडणूक आता प्रतिष्ठेची आहे.

महायुतीकडून विशेष लक्ष

विरोधकांनी आतापर्यंत एक मोट बांधण्यात यश नक्की मिळवले आहे. महायुतीचे पालकत्व मंत्री चंद्रकांत पाटील यांनी स्वीकारले आहे. महायुतीचा जयंतरावांना भाजपचा राज्यस्तरावरून सॉफ्ट कॉर्नर दिसायचा; जो यावेळी मात्र अजिबात नाही. मुख्यमंत्री देवेंद्र फडणवीस, उपमुख्यमंत्री एकनाथ शिंदे व उपमुख्यमंत्री अजित पवार यांचे थेट इथे लक्ष आहे. जागावाटपाचे घोडे अडतेय म्हटल्यावर या त्रिमूर्तींनी थेट हस्तक्षेप केल्याचे समजते. दोन्हीकडे साम, दाम, दंड, भेद या अस्त्रांचा पुरेपूर वापर झाला आहे आणि होणार आहे.

अर्थात यात जयंतरावांनी आजवर कधीच माघार घेतलेली नाही. भाजपचे शहरातील तीन पूर्वापार निष्ठावंताना गळाला लावत जयंतरावांनी डाव टाकला आहे. एरवी गुंड समर्थक पाळल्याच्या मुद्द्यांवर जयंतरावांना विरोधक लक्ष्य करायचे, तोच मुद्दा यावेळी त्यांनी पुढे करीत शहर गुंडांच्या ताब्यात द्यायचे की सज्जनांच्या याचा विचार शहरवासीयांनी करावा, अशी साद प्रारंभीच्या सभेत घातली आहे.

शेवटच्या क्षणापर्यंत वेध

एकमेकांचे संभाव्य उमेदवार वश करण्याची रणनीती दोन्हीकडून सुरू होती. अर्ज माघारीवेळीही ते चित्र दिसले. विजय कुंभार आणि महेश पाटील यांना जयंतरावांच्या गोटातून पुन्हा मागे वळवण्याचे शर्थीचे प्रयत्न निशिकांत पाटील यांनी केले. तेच नगराध्यक्षपदाचे मुस्लिम समाजाचे उमेदवार शाकीर तांबोळी यांच्याबाबत झाले. त्यांचा अर्ज राहावा, अशी मनोमन इच्छा महायुतीची होती; मात्र तांबोळी यांची माघार व्हावी, यासाठी जयंतरावांकडून सुरेंद्र पाटील यांनी यशस्वी प्रयत्न केले.

सांगलीत आघाड्यांचे कडबोळे

सांगली जिल्ह्यातील सहा नगरपालिका आणि दोन नगरपंचायतींत बहुतांश ठिकाणी स्थानिक आघाड्या आणि सोयीनुसार पक्ष-गटांची मोडतोड करून कडबोळे करण्यात आले आहे. आष्ट्यात दोन्ही राष्ट्रवादी (NCP) आमने-सामने आहेत. शरद पवार पक्षाचे दिवंगत माजी आमदार विलासराव शिंदे गटासमोर मोठे आव्हान उभे करण्याचा प्रयत्न झाला आहे. विट्यात भाजप विरुद्ध शिवसेना अशी पक्षीय लढत दिसत असली, तरी ती वैभव पाटील विरुद्ध आमदार सुहास बाबर अशी नव्या पिढीतील पारंपरिक लढाई आहे.

आटपाडीत शिवसेना शिंदे विरुद्ध भाजप अशी लढत होत असून, शरद पवारांच्या राष्ट्रवादीकडून फक्त नगराध्यक्षपद आणि एका नगरसेवक पदासाठी नवरा-बायको रिंगणात आहेत. येथे माजी आमदार राजेंद्रअण्णा देशमुख आणि त्यांचे बंधू अमरसिंह देशमुख यांनी सवतासुभा मांडला आहे. जतमध्ये तिरंगी लढत होत आहे. तेथे दोन्ही राष्ट्रवादी एकत्र आल्या असून ते ‘घड्याळ’ चिन्हावर लढत आहेत. काँग्रेसने (Congress) स्वतंत्र पॅनेल लावले असून भाजपही ताकदीने मैदानात उतरले आहे.