Mahavikasaghadi : कोल्हापुरात 'मविआ'ला 'उमेदवार मिळेना, चर्चेचं काथ्याकूट सुरूच

Kolhapur Political News : अवघ्या सहा महिन्यांवर लोकसभा निवडणूक आली आहे. मात्र, याची जाणीवच महाविकास आघाडीतील नेत्यांना नसल्याचे चित्र कोल्हापूर जिल्ह्यात आहे. भारतीय जनता पक्षाने मात्र गावोगावी सरकारने घेतलेल्या चांगल्या निर्णयाची माहिती देण्याचे काम सुरू झाले आहे.

विकसित भारत या संकल्पनेवर आधारित कार्यक्रमाच्या माध्यमातून वातावरण निर्मिती सुरू आहे. महायुतीचा उमेदवार ठरला नसताना प्रचाराला सुरुवात केली आहे. मात्र, महाविकास आघाडीच्या तिन्ही पक्षात अजूनही ताळमेळ नसल्याचे चित्र आहे.

त्यामुळे महाविकास आघाडीकडून लोकसभेसाठी ऐनवेळी सर्वमान्य उमेदवार देऊन धक्कातंत्राचा अवलंब केला जाण्याची शक्यता आहे.लोकसभा निवडणुकीत जिल्ह्यात महाविकास आघाडी विरुद्ध भाजप- सेना (शिंदे गट) महायुती असाच सामना निश्चित आहे. २०१९ च्या निवडणुकीत शिवसेना ठाकरे गटाच्या चिन्हावर विजयी झालेले दोन्ही खासदार मुख्यमंत्री एकनाथ शिंदे यांच्या शिवसेनेत गेले आहेत.

त्यामुळे या दोन्ही जागांवर शिंदे गटाचा दावा प्रबळ आहे. तथापि भाजपने यापैकी एक जागा पक्षाच्या 'कमळ' चिन्हावर लढवली जाईल, असे सांगत एका जागेवर भाजपचे मंत्री चंद्रकांत पाटील यांनी हक्क सांगितला आहे. त्यातून एक जागा भाजपला गेलीच तर आहे तेच उमेदवार रहाणार की दुसरा उमेदवार याविषयी उत्सुकता आहे.

भाजपच्या या दाव्याने शिंदे गटात अस्वस्थता आहे. महाविकासमध्ये काँग्रेस राष्ट्रवादी- शरद पवार गट व शिवसेना-उद्धव ठाकरे गट एकत्र आहेत. गेल्यावेळी दोन्ही जागा जिंकल्याने या दोन्ही जागांवर शिवसेना हक्क सांगण्याची शक्यता आहे.

पण, आजच्या घडीला या तीनही पक्षांकडे प्रबळ उमेदवार नाही. कोल्हापुरातून कॉंग्रेसला चांगली संधी दिसत असली तरी उमेदवार घेण्यास कोणी तयार नाही.

राष्ट्रवादी आणि ठाकरे गटाकड़ून जी नावे येतील त्यावर एकमत होईल का नाही, याविषयी शंका आहे. त्यातून ऐनवेळी उमेदवारीची घोषणा महाविकास आघाडीकडून शक्य आहे. शिवसेना युवा नेते आमदार आदित्य ठाकरे कोल्हापूर दौऱ्यावर येणार आहेत. त्यांच्या या दौऱ्यात उमेदवारी विषयी चर्चा होण्याची शक्यता आहे.

(Edited by Roshan More)