Sanjay Mandlik On Mushrif: नगरपालिका निवडणुकीच्या निकालानंतर मंडलिकांची मुश्रीफांवर डागली तोफ; म्हणाले, 'त्यांच्याबद्दल मला...'

Kolhapur News: कागल आणि मुरगूड नगरपालिकेचा निवडणुकीनंतर महायुतीचे नेते मंत्री हसन मुश्रीफ आणि माजी खासदार संजय मंडलिक यांच्यातील टोकाचा संघर्ष मिटेल असे वाटत असताना कागलच्या राजकारणाचे भवितव्य ठरणारे वक्तव्य माजी खासदार संजय मंडलिक यांनी केले. मुश्रीफ यांनी संजय मंडलिक (Sanjay Mandlik) यांना सोबत घेण्याचा प्रयत्न करून असे सांगितल्यानंतर मंडलिक यांनी थेट टीका केली.

मंत्री हसन मुश्रीफ यांच्याबद्दल मला काहीच बोलायचे नाही. कारण त्यांच्या विचारांवर मी राजकारण करत नाही. मुश्रीफ काय हिटलर लागून गेले नाहीत? मुश्रीफ यांच्याबद्दल विचारू नका, मरू देत तिकडे, अशा शब्दात मंडलिक यांनी भावना व्यक्त केल्या.

कागलमध्ये शिवसेनेचे उमेदवारच उभारणार नाहीत, असे वातावरण केले. परंतू आम्ही उमेदवार उभा करून टक्कर देत ३३ टक्के मते मिळविली. कागलमध्ये मंत्री मुश्रीफ आणि समरजित घाटगे यांची युती मतदारांना पसंत पडली नाही. शिवसेनेला मिळालेल्या मतांवरून कागलमध्ये पुढे होणार्या निवडणुकीची चुणूक मतदारांनी दाखवून दिली आहे. मुरगूडमध्ये विजय अपेक्षित होता. परंतू विरोधी बाजूंकडून पैशाचा मोठ्या प्रमाणात वापर करण्यात आला. त्यामुळे मताधिक्य कमी मिळाले. असा दावा मंडलिक यांनी केला.

हसन मुश्रीफ (Hasan Mushrif) सोयीचे राजकारण करत आहेत. कुणाला घ्यायचे आणि कुणाला नाही हे ते स्वतः ठरवतील. त्यांच्या मनाचे श्लोक मी कशाला बोलू. केडीसी बँकेतही त्यांनी असाच प्रकार केला होता. हे नको, ते नको म्हणून शेवटी महायुती केली. आता महायुतीचे प्रमुख आहेत तर त्यांनी त्या पध्दतीने विचार केला पाहिजे. त्यामुळे आमचे अस्तित्व दाखविण्याचा हा विषय आहे.

वास्तविक मंत्री मुश्रीफ यांच्याकडून आम्हाला कॉर्नर करण्याचा प्रयत्न गेल्या अनेक महिन्यापासून सुरू आहे. नगरपालिका निवडणूक हे त्याला निमित्त आहे. यापूर्वी गोकुळच्या निवडणुकीत विरेंद्र मंडलिक यांचा पराभव केला. त्याचे विश्लेषण करताना माझ्या लक्षात आले की कुर्हाडीचा दांडा गोतास काळ... ही भीती मुश्रीफ यांना आहे. कदाचित मंडलिक पुढच्या राजकारणात आपल्याला अडचणीचे ठरू शकतात असे वाटत असल्याने मुश्रीफ हे निर्णय घेत असतील, असेही मंडलिक यांनी सांगितले.