Video Vishalgad Fort : मोठी बातमी! विशाळगडावर जाण्यापासून शाहू महाराजांसह नेत्यांना पोलिसांनी रोखलं

कोल्हापुरातील विशाळगडावरील अतिक्रमण हटविण्याच्या मोहिमेला रविवारी हिंसक वळण लागलं. किल्ले विशाळगडावरील अतिक्रमण हटविण्याची मागणी शिवप्रेमींनी केली होती. माजी खासदार संभाजीराजे छत्रपती यांनीही शिवप्रेमींना विशाळगड येथे येण्याचं आवाहन केलं होतं.

त्यानंतर जमावानं विशाळगडावर दगडफेक आणि जाळपोळ केली. यात अनेक घरे, वाहनांचे नुकसान झालं. यावरून खासदार शाहू महाराज छत्रपती रोष व्यक्त करत सरकारला धारेवर धरलं होतं. यातच खासदार शाहू महाराज हे विशाळगडाच्या पाहणीसाठी निघाले होते. पण, विशाळगडाकडे जाण्यापासून पोलिसांनी रोखलं आहे.

रविवारी मोठ्या प्रमाणात शिवप्रेमी विशाळगडावर दाखल झाले होते. त्यानंतर घोषणाबाजी सुरू झाली. काही वेळानं माजी खासदार संभाजीराजे छत्रपती गडाखाली आल्यानंतर त्यांना रोखण्यात आलं. त्यामुळे जमावानं गोंधळ घालण्यास सुरूवात केली. हिंसक जमावानं जाळपोळ, तोडफोडीसह घरांवर हल्ले केले. या सगळ्या प्रकरणावरून खासदार शाहू महाराज छत्रपती ( Shahu Maharaj Chhatrapati ) यांनी नाराजी व्यक्त केली होती.

“विशाळगड येथे झालेला हिंसाचार मनाला वेदना देणार आहे. कोणत्याही समाजघटकांवर अन्याय होत असेल, तर त्यांच्या संरक्षणाची जबाबदारी आमची आहे. विशाळगडावर सरसकट अतिक्रमणे काढण्याची कारवाई प्रशासनानं तातडीनं करावी. आम्ही घटनास्थळाला भेट देऊन पाहणी करणार आहोत,” असं सोमवारी खासदार शाहू महाराज छत्रपती यांनी म्हटलं होतं.

यानंतर आज खासदार शाहू महाराज छत्रपती, माजी मंत्री सतेज पाटील ( Satej Patil ), माजी आमदार सत्यजित पाटील-सरूडकर आणि अन्य नेते हे विशाळगडाकडे घटनास्थळी जाण्यास निघाले होते. पण, जमावबंदीच्या कारणास्तव पोलिसांनी खासदार शाहू महाराज छत्रपती, सतेज पाटील आणि अन्य नेत्यांना जाण्यापासून रोखलं. यामुळे कार्यकर्त्यांमध्ये तणावाचं निर्माण झालं आहे. यावेळी पोलिस आणि पत्रकारांमध्ये झटापट झाल्याची माहिती मिळत आहे.