Satara Assembly Election 2024 : भाजप की ठाकरेंची शिवसेना, सातारकरांचा कौल कुणाला?

Saam Exit Poll : राज्यात विधानसभा निवडणुकीसाठी मतदान पार पडलं असून या निवडणुकीचा निकाल उद्या शनिवारी 23 तारखेला जाहीर होणार आहे. राज्यात कोणाचं सरकार येणार याबाबतचे विविध एक्झिट पोलकडून अंदाज व्यक्त करण्यात येत आहेत.

तर 'साम टीव्ही'ने विधानसभा मतदारसंघनिहाय एक्झिट पोल जाहीर केला आहे. प्रत्येक विधानसभा मतदारसंघातील संभाव्य आमदार कोण? याबाबतचा अंदाज पोलमधून व्यक्त करण्यात आला आहे.

या पोलमध्ये सातारा मतदारसंघातून कोण विजयी होणार याबाबतचा अंदाजही व्यक्त करण्यात आला आहे. सामच्या एक्झिट पोलनुसार या मतदारसंघात भाजपचे उमेदवार शिवेंद्रराजे भोसले विजयी होण्याची शक्यता आहे. त्यांना या मतदारसंघातून जास्तीत जास्त मताधिक्य मिळण्याची शक्यता आहे.

सातारा विधानसभा मतदारसंघात महायुतीकडून भारतीय जनता पक्षाचे उमेदवार शिवेंद्रराजे भोसले (Shivendraraje Bhosale) विरुद्ध महाविकास आघाडीकडून शिवसेना उद्धव बाळासाहेब ठाकरे पक्षाचे अमित कदम यांच्यात प्रमुख लढत आहे. मात्र, ठाकरेंच्या शिसेनेचे उमेदवार नवखे असून ते याआधी अजित पवार गटात होते.

तिथे त्यांना उमेदवारी न मिळाल्याने त्यांनी ठाकरेंच्या शिवसेनेत (Shivsena) प्रवेश करत उमेदवारी मिळवली. तर दुसरीकडे भाजपचे शिवेंद्रराजे भोसले यांचा दांडगा जनसंपर्क या मतदारसंघात आहे. शिवाय त्यांच्यामागे त्यांचे बंधू उदयनराजे भोसले यांची मोठी ताकद आहे. त्यामुळे शिवेंद्रराजे भोसले हे आमदार होण्याची दाट शक्यता वर्तवली जात आहे.

तर मतदारसंघातील परिस्थिती पाहता शिवेंद्रराजे हेच या निवडणुकीत विजयी होतील अशा चर्चा मतदारसंघात सुरू आहेत. तर शिवेंद्रराजे केवळ जास्तीचे मताधिक्य मिळवण्यासाठी मैदानात उतरल्याची चर्चाही त्यांच्या कार्यकर्त्यांमध्ये सुरू आहे.