Mahayuti Government : महायुतीचा 'मविआ'ला नवा झटका; मुंबईत 3 तर इतर महापालिकांमध्ये 4 सदस्यीय प्रभाग

Mumbai Political News :

राज्यातील खोळंबलेल्या महापालिका निवडणुकींबाबत राज्य सरकारने मोठा निर्णय घेतला आहे. महाविकास आघाडीच्या काळातील तीन सदस्य प्रभाग रचना रद्द करण्याचा निर्णय महायुती सरकारने घेतला आहे. सरकारने महापालिका निवडणुकीत पुन्हा चार सदस्य प्रभाग रचना करण्याचा निर्णय घेतला आहे. या नव्या निर्णयात कोल्हापूर महापालिकेचाही समावेश आहे. मुंबई वगळता राज्यातील सर्व महापालिकांमध्ये नवीन प्रभाग रचना असणार असून विधानसभेत विधेयक मंजुरीसाठी ठेवले जाणार आहे.

राज्यातील 24 महापालिकांची मुदत संपली आहे. निवडणुकीसाठी (Elections) लगतच्या लोकसंख्येनुसार तीन सदस्य प्रभाग रचना करण्याचे आदेश महाविकास आघाडी सरकारने दिले होते. तर कोरोना काळात निवडणूक लांबणीवर गेल्यानंतर डिसेंबर 2020 मध्ये निवडणूक प्रक्रिया सुरू झाली होती. यानुसार काही महापालिकामध्ये एक सदस्य प्रभागरचना प्रसिद्ध करून आरक्षण काढण्यात आले. मतदारयादीही अंतिम करण्यात आली होती.

मात्र मार्च 2021 मध्ये निवडणूक प्रक्रिया स्थगित करण्याचे आदेश आले. महाविकास आघाडी सरकारने (MVA) बहुसदस्य प्रभाग पद्धतीने निवडणूक घेण्याचे आदेश दिले. त्यानुसार ऑक्टोबर 2021 मध्ये त्रिसदस्यीय प्रभागरचनेनुसार महापालिकेची प्रभागरचना करण्यात आली. तत्कालीन शासनाच्या आदेशानुसार नगरसेवकांची संख्या वाढवण्यात आली. मात्र सुप्रीम कोर्टाच्या निर्णयामुळे महापालिकेच्या निवडणुका लांबणीवर पडल्या आहेत.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

आता लोकसभा आणि त्यानंतर येणाऱ्या विधानसभा निवडणुकांमुळे (Assembly Election) महापालिकांच्या निवडणुकांबाबत सरकार सकारात्मक झाले आहे. लोकसभा निवडणूक झाल्यानंतर केव्हाही महापालिका निवडणुकांचे बिगुल वाजू शकते. त्या अनुषंगाने राज्य सरकारने महाविकास आघाडी सरकारने घेतलेल्या तीन सदस्यीय प्रभाग रचना रद्द करून मुंबई वगळून राज्यातील सर्वच मुदत संपलेल्या महापालिकेत चार सदस्य प्रभाग रचना करण्याचा निर्णय घेतला असल्याची माहिती आहे. याबाबत आज विधेयक विधानसभेत मंजुरीसाठी येणार आहे.

(Edited by Avinash Chandane)