Malkapur Election : मलकापूर नगरपालिकेच्या निवडणुकीची प्रमुख लढत भाजप आणि राष्ट्रवादीमध्ये दुरंगी होत आहे. सहा जागा बिनविरोध करत भाजपने या ठिकाणी बाजी मारली असून, उर्वरित 16 जागांसाठी शेवटच्या टप्प्यात कडवी लढत होत आहे. सुरुवातीला भाजपचे पारडे जड असले तरी राष्ट्रवादीने समविचारी पक्षांना एकत्र करून भाजपविरोधात आव्हान उभे केले. भाजपने 22-0 चा नारा दिला आहे. मात्र, समविचारी आघाडीने अनेक प्रभागांत जागा निवडून येतील, अशी रणनीती आखली असल्याने निवडणुकीमध्ये ट्विस्ट आला आहे.
मनोहर शिंदे यांनी भाजपमध्ये प्रवेश केल्यामुळे मलकापुरात भाजप भक्कम झाला आहे. 22 वर्षांपासून त्यांच्याकडे मलकापूरची सत्ता असल्याने त्यांनी राबवलेल्या नावीन्य उपक्रमांचा, केलेल्या विकासकामांचा आणि नागरिकांशी असलेल्‍या थेट संपर्काचा भाजपला फायदा होणार आहे. प्रशासकीय इमारत, सांडपाणी योजना, 24 तास गॅस पुरवठा, 24 तास पाणी योजनेचे बळकटीकरण, शेतीवरील आरक्षणे कमी करणे व विकसित करणे आधी कामांचा ध्यास घेऊन ते मतदारांपर्यंत पोहोचत आहेत.
प्रभाग एकमध्‍ये शिवसेना ठाकरे गटाचे नितीन काशीद यांची लढत भाजपचे प्रशांत चांदे यांच्याशी होत आहे. काशीद यांनी यापूर्वी अनेक आंदोलने करून शहरातील मागण्या मान्य केल्‍या आहेत. त्यांना समविचारी आघाडीचे पाठबळ आहे, तर चांदे हे माजी नियोजन सभापती होते. त्यांचे चुलते शंकरराव चांदे व ते काँग्रेसमधून निवडून आले होते. त्यांनी या प्रभागातील अनेक विकासकामे यापूर्वी केली आहेत. अनेक वर्षांपासून प्रभाग एक हा त्यांचा बालेकिल्ला म्हणून ओळखला जातो.
दुसऱ्या जागी माजी नगराध्यक्ष मोहन शिंगाडे यांच्या पत्नी अश्विनी शिंगाडे यांच्‍यासमोर राष्ट्रवादीच्या कांचन लोहार व शिवसेनेच्या रब्बाना शेख यांचे आव्हान आहे. प्रभाग दोनमध्‍ये भाजप-राष्ट्रवादी आमने-सामने असून, या प्रभागात माजी नगरसेवक दिनेश रैनाक व माजी नगरसेविका गीतांजली पाटील हे भाजपकडून लढत आहेत. यापूर्वी नगरसेवकपद भूषवल्याने त्यांचा या प्रभागांमध्ये दबदबा आहे. श्री. रैनाक यांच्यापुढे भीमाशंकर माऊर यांनी आव्हान दिले आहे. त्यांनी अपक्ष उमेदवारी जाहीर केली आहे. त्यांना राष्ट्रवादी व समविचारी आघाडी मदत करणार आहे. श्री. पाटील यांच्यापुढे विजया सूर्यवंशी यांचे आव्हान आहे.
प्रभाग तीनमध्‍ये माजी नगराध्यक्षा नीलम येडगे यांचे पती धनंजय येडगे यांना भाजपकडून उमेदवारी मिळाली आहे. यापूर्वी त्यांचे वडील शामराव येडगे नगरसेवक होते. त्यांनी या प्रभागातील विकासकामे मार्गी लावली होती. धनंजय येडगे यांचा जनसंपर्क चांगला आहे. त्यांच्यापुढे नवखे काँग्रेसचे उमेदवार कृष्णत पुजारी यांनी आव्हान दिले आहे. दुसऱ्या जागेसाठी रंजना पाचुंदकर यांची बिनविरोध निवड झाली आहे. प्रभाग चारमध्‍ये माजी नगराध्यक्ष व माजी नगरसेविका यांच्यात लढत होत आहे. माजी नगराध्यक्षा कल्पना रैनाक यांना माजी नगरसेविका आनंदी शिंदे यांनी राष्ट्रवादीच्या माध्यमातून आव्हान दिले आहे. या प्रभागातील दुसऱ्या जागेवर भाजपचे सुनील खैरे बिनविरोध निवडून आले आहेत.
प्रभाग पाचमध्‍ये राजेंद्र यादव यांच्यापुढे दादा शिंगण यांचे आव्हान आहे. माजी बांधकाम सभापती, युवकांचे नेते असलेल्‍या राजेंद्र यादव यांच्या पत्नी अनिता यादव यांनीही नगरसेविका म्हणून काम पाहिले आहे. आमदार अतुल भोसले यांचे ते निकटवर्तीय असून, मनसेचे तालुकाध्यक्ष श्री. शिंगण यांनी त्यांना आव्हान दिले आहे. श्री. शिंगण यांनी यापूर्वी नगरसेवक म्हणून या प्रभागाचे नेतृत्व केले आहे. २४ तास पाणी, सांडपाणी योजना, रस्ते, गटारे, महामार्गाची गैरसोयीबाबत त्यांची आंदोलने लक्षवेधी ठरली होती. दुसऱ्या जागेसाठी माजी नगरसेवक अमर इंगवले यांच्या पत्नी मृणालिनी इंगवले यांनी भाजपच्या उमेदवार शुभांगी माळी यांच्यापुढे आव्हान उभे केले आहे. महिला आरक्षणामुळे अमर इंगवले यांनी आपल्‍या पत्‍नीला येथून उतरवले आहे.
राष्ट्रवादी (NCP) आणि भाजपमध्ये सरळ लढत होत असलेल्‍या प्रभाग सहामध्‍ये आमदार भोसले यांचे निकटवर्तीय सूरज शेवाळे यांची लढत राष्ट्रवादीचे संदीप मुटल यांच्याशी होणार आहे. श्री. शेवाळे, श्री. मुटल यांचा सामाजिक कार्यात नेहमी सहभाग असतो. दोघेही प्रथमच निवडणुकीला उभे राहात असून, शेवाळे यांच्या पाठीशी भाजप, तर मोठ्यांच्या पाठीशी राष्ट्रवादी व कर्मचारी आघाडी ठामपणे उभे आहे. दुसऱ्या जागेसाठी भाजपकडून सीमा सातपुते व राष्ट्रवादीकडून काजल माने यांच्यात लढत होत आहे. दोन्ही उमेदवार नवीनच असून, प्रथमच निवडणूक लढवत आहेत.
प्रभाग सातमध्‍ये भाजपचे दोन्ही उमेदवार बिनविरोध झाले असून, प्रभाग आठमध्‍ये माजी नगरसेवक विरुद्ध भाजप उमेदवार अशी लढत होणार आहे. या प्रभागामध्ये राष्ट्रवादीतून माजी नगरसेवक सागर जाधव यांची लढत भाजपचे (BJP) उमेदवार शरद पवार यांच्याशी होत आहे. श्री. जाधव यांनी या प्रभागाचे नगरसेवक म्हणून नेतृत्व केले आहे. झोपडपट्टीचा विकास हा अजेंडा घेऊन ते निवडणुकीत उतरले आहेत. शरद पवार पवार हे नव्याने निवडणूक लढवत असून, भाजपने त्यांना उमेदवार दिली आहे. या ठिकाणी शिवसेना शिंदे गटाकडून अक्षय पाटणकर निवडणूक लढवत आहेत. या प्रभागातील दुसऱ्या जागेसाठी माजी नगरसेविका स्वाती तुपे हे भाजपमधून निवडणूक लढवत आहेत. राष्ट्रवादीच्या छाया भोसले यांनी त्यांच्यापुढे आव्हान ठेवले आहे. स्वाती तुपे यांनी या प्रभागाचे यापूर्वी नेतृत्व केले असल्याने या ठिकाणी त्यांनी विकासकामे केली आहेत, तर राष्ट्रवादीच्या भोसले या नव्याने निवडणूक लढवत आहेत.
प्रभाग नऊमधील जोत्सना शिंदे व दीपाली पवार यांची बिनविरोध निवड झाली आहे. प्रभाग दहामध्‍ये माजी नगरसेविका विजया शिंदे व उमा शिंदे यांचे पती प्रमोद शिंदे भाजपकडून निवडणूक लढवत आहे. प्रमोद शिंदे यांच्या कुटुंबाने दोन वेळा या प्रभागाचे नेतृत्व केले आहे. त्यांच्यापुढे राष्ट्रवादीचे प्रशांत पोतदार यांनी आव्हान उभे केले आहे. पोतदार हे नव्याने प्रथमच निवडणूक लढवत आहेत. या प्रभागातील दुसऱ्या जागेसाठी शेतीमित्र अशोकराव थोरात यांच्या सूनबाई व माजी विरोधी पक्षनेते अजित थोरात यांच्या वहिनी डॉ. स्वाती थोरात या भाजपमधून निवडणूक लढवत आहेत. त्यांच्यापुढे स्नेहल पाटील यांनी राष्ट्रवादीतून आव्हान दिले आहे. या प्रभागात कोण निवडून येणार, याकडे सर्वांचे लक्ष आहे.
पालिकेचे माजी उपनगराध्यक्ष म्हणून गेली २२ वर्षे मलकापुरात कार्यरत असलेले मनोहर शिंदे यांचा बालेकिल्ला असलेल्‍या प्रभाग ११ मध्‍ये त्यांच्यापुढे नवखे उमेदवार अनुराग थोरात यांनी अपक्ष उमेदवारी जाहीर केली आहे. प्रभागातील अनेक समस्यांवर ते प्रकाश टाकत आहेत. दुसऱ्या जागेसाठी मनोहर शिंदे यांचे निकटवर्तीय सचिन जगताप यांच्या वहिनी राजश्री जगताप या भाजपकडून निवडणूक लढवत आहेत. जगताप यांचा मोठा जनसंपर्क आहे. त्यांना अपक्ष उमेदवार वैशाली पाटील, छाया येडगे यांनी आव्हान दिले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
