Maan : माण, खटाव मतदारसंघाचा सर्वांगीण विकास हेच माझं मंत्रिपद...

गोंदवले : माझ्या माणच्या विकासासाठीचे सर्व प्रश्न सुटावेत यासाठीच माझा सदैव प्रयत्न राहिला आहे आणि यापुढेही राहणार आहे. माण-खटावचा विकास हेच माझे मंत्रिपद आहे, असे मत भाजपचे आमदार जयकुमार गोरे Jaykumar Gore यांनी व्यक्त केलंय.

माणला मंत्रिपद देण्याचा शब्द सत्ताबदलानंतर उपमुख्यमंत्री देवेंद्र फडणवीस पाळणार का या प्रश्नावर आमदार गोरेंनी हे उत्तर दिले आहे. माण, खटावचे आमदार गेल्या विधानसभा निवडणुकीत भाजपवासिय झाले आहेत. मतदारसंघाच्या विकासासासाठीच आपण पक्ष बदलला असल्याबाबत त्यांनी अनेकदा जाहीरपणे सांगितले आहे.

भाजपमध्ये जाण्यापूर्वीपासूनच तत्कालीन मुख्यमंत्री देवेंद्र फडणवीस यांच्याशी चांगले संबंध असल्याने त्यांच्या माध्यमातून मतदारसंघातील अनेक विकासकामे होण्यास मदत झाल्याचे कबुली आमदार गोरेंनी यापूर्वीही दिली आहेत. गत विधानसभा निवडणूक प्रचारा दरम्यान, श्री. फडणवीस यांनी आमदार गोरेंना मंत्रिपद देणार असल्याचे जाहीर वक्तव्य केले होते. आमदार गोरे निवडून आले, परंतू, राज्यात महाविकास आघाडीचे सरकार स्थापन झाल्याने अडचण निर्माण झाली होती.

गेल्या महिनाभरात राज्यात सत्तापालट होऊन शिंदे-फडणवीस सरकार स्थापन झाले. या बदलामुळे माणला मंत्रिपद मिळण्याची शक्यता निर्माण झाली आहे. उपमुख्यमंत्री फडणवीस व आमदार गोरे यांची जवळीक पाहता याबाबत जनतेतून सकारात्मक चर्चाही होत आहेत. मंत्रीपदाबाबत बोलताना आमदार गोरे म्हणाले, ''माण खटावच्या जनतेचे प्रश्न सोडविण्यासाठीच मी आमदार झालो आहे.

दुष्काळी भागात पाणी आणण्यात मी यश मिळवलंय. जिहे कठापुरचे पाणीही लवकरच आंधळी तलावात येईल. म्हसवड एमआयडीसी सुद्धा इतरत्र कुठे जाणार नाही. शेती, रोजगार, उद्योग, शिक्षण, आरोग्य या प्रश्नातही आमूलाग्र सकारात्मक बदल घडवायचे आहेत. शिवाय इतर लोकाभिमुख अनेक विकासकामे पूर्ण करायची आहेत. त्यासाठी मंत्रिपद असावं किंवा नसावं हे माझ्यासाठी महत्त्वाचं नाही. माझ्या मतदारसंघाचा सर्वांगीण विकास हेच माझं मंत्रिपद आहे, असे त्यांनी स्पष्ट केले.